ဘင်္ဂလားသို့ပြန်၍

ဘင်္ဂလားသို့ပြန်၍
============
အိုက်ဇောတွင် (၆) လလောက်နီပြီး ဘင်္ဂလားဒေခ်ျရောက် ရခိုင်ကျောင်းသားများနှင့်အဆက်အသွယ်ပြုလုပ်ရန် ကိုရန်နိုင်နှင့်အကျွန်ုပ် အတူတူ ခရီးထွက်ခွာပါသည်။ ဆီးဆာမှတဆင့် အာကုတ္တလာ၊ အာကုတ္တလာမှ တဆင့်ဘောင်းကူသို့ ခရီးဆက်သည်။ ဘောင်းကူတွင် ALP ဥက္ကဌခိုင်ရဲခိုင်ဟိနီ၍ ဥက္ကဌခိုင်ရဲခိုင်နှင့် လားတွိဖြစ်လိုက်ပါသည်။ လားတွိစဉ်က ကိုရန်နိုင်ဇာနီရာသို့လားနီ၍မသိ အကျွန်ုပ်တယောက်တည်း လားတွိဖြစ်ပါသည်။ ဥက္ကဌမှာ ဘော်ဒီကတ်ရဲဖော်တယောက်နှင့်အတူနီသည်။ ဘော်ဒီကတ်ရဲဖော်၏နာမည်ကိုကား မမှတ်မိလိုက်ပါယာ။ ဘော်ဒီကတ်ရဲဖော်က ဥက္ကဌခိုင်ရဲခိုင်အား အကျွန်ုပ်က အလေးမပြုသဖြင့် ကောင်းကောင်းစိတ်ဆိုးသည်ဟုဆိုသည်။ အေကောင် ငါရို့ဥက္ကဌကို မလေးမခန့်လုပ်တေဟုပြောကြောင်း နောက်မှ ကိုရန်နိုင်ပြောပြ၍သိရသည်။ ဘောင်းကူတွင် တရက်နှစ်ရက် နယ်စပ်ချောင်းကိုဖြတ်ရန် အချိန်ကိုစောင့်ရသည်။ လမ်းပြလုပ်ပီးသူကို ငွေပီးရသည်။ ထိုဖက်ကမ်း ဒေဖက်ကမ်းအချက်ပြပြီး အစောင့်ယှင်းသောအခါ ချောင်းကိုဖြတ်ရသည်။ သို့သော် အကျွန်ုပ်ရို့ ချောင်းကိုဖြတ်ပြီးသည်နှင့် BDR အစောင့်ရဲနှင့်တိုး၍ ချက်ချင်းအဖမ်းခံရသည်။ အကျွန်ုပ်ရို့က အိန္ဒိယဖက်မှ လာသည်ကိုမပြော။ မြန်မာပြည်ကျေကျာင်းသားများဖြစ်ကြောင်း၊ စားဝတ်နီရီးအခက်အခဲကြောင့် လွန်ခသော သုံးရက်အယင်က အန္ဒိယဖက်ကမ်းဟိ ရခိုင်သားများပါးက အငွေအလှူလားကောက်ကြောင်း လိမ်ပြောပါသည်။
အသူလမ်းပြရေလဲမီးသောအခါ ဘာ့စ်ကားထက်တွင် အ၀တ်ဖြူဖြူ ၀ထုပ်ဆောင်း၍ မုတ်ဆိတ်နှင့် စိတ်သဘောကောင်းသော ၀ါကြီးတယောက်နှင့် အသိဖြစ်၍ အကျွန်ုပ်ရို့အား သနားသဖြင့် သူကလိုက်ပြကြောင်းဖြေလိုက်သည်။ အမှန်မှာ မောလဗီ ဗလီဆရာတယောက်အား ပုံဖော်ခြင်းဖြစ်သည်။ လူကိုမြင်ကေမှတ်မိဖို့လားမီးသောအခါ အတိအကျမှတ်မိရေဟု လုံးဝအာမခံပီးလိုက်သည်။ ဇာနီရာက ကူးရေလဲပြောသောအခါ အကျွန်ုပ်နှင့် ကိုရန်နိုင်က အကြံထုတ်၍ BDR ရဲသားအား နယ်စပ်ချောင်းနားသို့မျှားခေါ်လားပြီး ချောင်းနားရောက်လျှင် BDR ရဲသားအား ကန်ကျောက်၍ ထွက်ပြီးကတ်ဖို့ အကြံရသည်။ သို့ဖြင့် BDR ရဲအား ချောင်းကမ်းနားသို့ မျှားခေါ်လားသည်။ ချောင်းနားသို့ရောက်ခါ ကိုရန်နိုင်က မကန်ကျောက်ဝန့်။ ချောင်းကိုဖြတ်ပြီးသောအခါ အကျွန်ုပ်က ဖင်လီးနီလျှင် သီနတ်နှင့်အပစ်ခံရဖို့စွာ ကြောက်၍ဖြစ်သည်။ တနီရာအရောက်တွင် ယုတ္တိဟိသောတနီရာအား အေနီရာက ကူးကြောင်း အတိအကျပြောလိုက်သည်။ မောလဗီအိမ်ကို မြင်ကေမှတ်မိဖို့လား မီးသောအခါ မှတ်မိတောင်ကလာဟု ရဲရဲဝန့်ဝန့် အာမခံလိုက်သည်။ သို့ဖြင့် ရပ်ကွက်တိုင်း အိမ်တိုင်းကိုခေါ်လားပြီး မော်လဗီအိမ်ကို လိုက်ရှာခိုင်းသည်။ ထိုအိမ်ဖြစ်နိုးနိုး ဒေအိမ်ဖြစ်နိုးနိုးဖြင့် အကျွန်ုပ်ရို့အား (၂) နာရီလောက် လိုက်ရှာခိုင်းသည်။ ငါရို့ရောက်ချိန်က မှောင်နီယာ။ အိမ်ကို ကောင်းကောင်းမမှတ်မိယာဟု အကြောင်းပြလိုက်သည်။ မတွိသောအခါ စခန်းသို့ ခေါ်ယူလားသည်။ ပဇောင်ပိုင်ယှောင် ရှာတွိဖို့လဲ။ မော်လဗီကား အဂယင့်က မဟုတ်။ (ဆက်ရန်)

ဇင်မဘောက်မှသည်

ဇင်မဘောက်မှသည်
============
အိုက်ဇော၌ အကျွန်ုပ်လှည့်ပတ်ပြီးနီပါသည်။ ကိုမောင်ငါရို့အိမ်တွင် တခဏနီပြီး ကိုလော်မာရို့အိမ်တွင် လားနီပါသည်။ ထိုအချိန်က ကိုလော်မာအစ်မမှာ အပျိုကြီး၊ အကျွန်ုပ်ထက် အသက်လေးငါးနှစ်ကြီးသည်။ အနီအထိုင် ယဉ်ကျေးသိမ်မွိသည်။ အပ်ခြုပ်သည်။ ကိုလော်မာက ကျောင်းဆရာလုပ်သည်။ မြန်မာပြည်မှ မီဇိုးလူမျိုးများဖြစ်သည်။ နောက် မီဇူးကျောင်းဆရာတယောက်အိမ်၌နီသည်။ သူ၏မယားမှာ မဏိပူရ ကသဲလူမျိုးဖြစ်သည်။ သူက မြန်မာကျောင်းသားလှုပ်လျှားမှု အခြီနီမဟန်မှန်းသိ၍ အကျွန်ုပ်အား ပြည်ထဲသို့ ပြန်ဝင်လားရန် တိုက်တွန်းသည်။ ထို့ကြောင့် သူ့အိမ်တွင် နီမပျော်၍ ဇင်မဘောက်စခန်းသို့လားနီသည်။
ဇင်မဘောက်မှာ အိုက်ဇောမြို့၏အရှိမြောက်ဖက် သုံးမိုင်ခန့်အကွာ ကျွန်းရွာချေတရွာဖြစ်သည်။ အိုက်ဇောမှာ ဇင်မဘောက်သို့ ဘာ့စ်ကားဟိသည်။ သို့သော် များသောအားဖြင့် အကျွနင်္ုပ်ရို့က ခြီကျင်လမ်းလျှောက်လားတတ်သည်။ ဇင်မဘောက်၌ အတူနီသည့်မြန်မာကျောင်းသားများမှာ ကိုထွေး (ယခု) အိန္ဒိယ၊ ကိုထွန်းထွန်း (ယခု) မြန်မာ။၊ ကိုဇော်ဌေး (ယခု) သြစတျေးလျ၊ ကိုမိုး (ကနေဒါ)(ကွယ်လွန်)၊ ကိုမြင့်အေး (နော်ဝေး)၊ ဆန်နီ၊ မိုးချုပ် (ယခု) VOA သတင်းထောက်။၊ ငွေတိုး၊ ကိုနိုင် (ယခု)(မြန်မာ)၊ ဒေါက်တာဇော်ဝင်းအောင် (ယခု) အမေရိက၊ မသင်းသင်းအောင် (ယခု)(မြန်မာ) မဇျှိမသတင်းစာအယ်တီတာချုပ် လီယာဉ်ပြန်ပီးဆွဲသမား ကိုစိုးမြင့်ဇနီး၊ ကိုဗလ (ယခု) အိန္ဒိယ၊ ကိုသန်းလင်း (ရခိုင်)(ကျောက်တော်)(ကွယ်လွန်)၊ ကိုဝင်းထွန်း (ကျဆုံး)၊ ဦးညွန့်လှ (ကနေဒါ)၊ ဒေါ်မော်လီ (ကနေဒါ)၊ ကိုလတ် (ယခု) သြစတျေးလျ၊ ကိုဝင်းအောင် (ယခု) သြစတျေးလျ၊ ကိုမင်းမင်း (မြန်မာ)၊ ကိုဇင်နိုင် (မြန်မာ)၊ ကိုမောင်ဖုန်း (အိုက်ဇော)၊ ကိုထွန်းရီ၊ (မြန်မာ)၊ ကိုသန်းထွန်း (တီးတိန်)၊ ကိုသားကြီး (ယခု) သြစထျေးလျ။ ကိုလှထွန်းဖြစ်သည်။
စားဝတ်နီရီးအတွက် ကျောင်းသားများက မြီတူး၊ လမ်းဖောက်၊ ခြည်ချလုပ်ကတ်ရသည်။ အကျွန်ုပ်ရို့က ရက္ကန်းမခတ်တတ်သဖြင့် မြန်မာပြည်က ရက္ကန်းသမားများအတွက် ခြည်ချပီးပါသည်။ ရက္ကန်းသများများအတွက် အကျိုးဟိရေပိုင် အကျွန်ုပ်ရို့အတွက်လည်း တွက်ခြေကိုက်သည်။ တခါတခါ မြီလားတူးရပါသည်။ တရက်နိမြီလားတူးရသောအိမ်မှာ နွားသတ်ရုံဖြစ်နီသည်။ နွားထီးတကောင်ကို သတ်သည်။ အကျွန်ုပ်လည်း အတွိအကြုံဖြစ် တွိဖူးမြင်ဖူးသည်ဟိအောင် မြီတူးသည်ကိုရပ်၍ ဤအတိုင်းထိုင်ကြည့်နီပါသည်။ နွားမှာ အသတ်ခံရမည်ကိုသိ၍ လူကဲ့သို့ မျက်ရည်ကျသည်။ မိမိမှာ ဂြိုဟိယင့်သားနှင့် ပြန်၍မခုခံ ဤအတိုင်းရာအသတ်ခံလားသည်။ ဂြိုနှင့်တချက်ခတ်လိုက်လျှင် ဂွင်ချင်း အသက်ထွက်လားမည်မှာ အမှန်။ တိရိစ္ဆာန်ဖြစ်ယင့်သားနှင့် လူထက်ပင်လျှင် သူတော်ကောင်းစိတ်ဟိသည်။ ထို့ကြောင့် ဟိန္ဒူလူမျိုးများက နွားသားစားခြင်းကို ယှောင်ကြည်ခြင်းဖြစ်မည်။ မသတ်အပ်၊ မစားအပ်သောအသက်ဖြစ်၍ မသတ်မစားခြင်းဖြစ်မည်။ အကျွန်ုပ်ရို့ကား ဗုဒ္ဓဘာသာဆိုသော်လည်း တွိမယှောင်အကုန်သတ်၊ တွိမယှောင် အကုန်စားသည်။ လူဖြစ်သော်လည်း တိရိစ္ဆာန်နှင့် ထူးမခြားနားဖြစ်သည်။
ဇင်မဘောက်၌နီစဉ်အတွင်းထူးခြားသည်မှာ ၁၉၉၀ ခု World Cup ကမ္ဘာ့ဖလားပွဲဖြစ်သည်။ ဂျာမဏီက မာရဒိုနာဦးဆောင်သော လက်ဟိချန်ပီယံ အာဂျင်တီးနားကို နောက်ဆုံးဖိုင်နယ်တွင် ၁ ဂိုး ၀ ဖြင့် အနိုင်ရလိုက်သော အီတလီနိုင်ငံ၌ကျင့်ပသောပွဲဖြစ်သည်။ ထိုအချိန်ကတည်းကပင် မီဇူရမ် ကျွန်းရွာချေတရွာ၌ပင် ကမ္ဘာ့ဖလားပွဲကို Live ကြည့်ရှုနိုင်ပြီးဖြစ်သည်။ ကိုမိုး၊ မောင်ဖုန်းနှင့်ရင်းနှီးသော မီဇူးဝါကြီးမလင်မယားအိမ်တအိမ်ဟိသည်။ မက်မန်းသီးများစွာသီး၍ မက်မန်းသီးဝစွာစားခရသည်။ မိုးဦးကျ ၀ါးတုတ်ထွက်သဖြင့် ချောင်းကိုလား၍ ၀ါးတုတ်လားခူးပါသည်။ ချောင်းကိုရောက်ပြီးမှ မိမိရို့နီရာ ဇင်မဘောက်ရွာကို လှမ်းကြည့်သောအခါ မယုံကြည်နိုင်စရာ မိုးရိပ်ခဲများမှာ ရွာအောက်တောင်ခါးပန်းမှ ပတ်လားနီသည်ကိုမြင်ပြီးမှ မိမိရို့နီသည်မှာ မိုးထက်မြင့်ကြောင်းသဖောပေါက်သည်။ ထို့ကြောင့် တခါတခါ အိမ်ကမယားသည်ကိုလည်း နင်ရို့တိမှာ ဇာဖြစ် ကောင်းခင်ဘုံကိုရောက်ဖို့ကျည်း ဆုတောင်းနီကတ်စွာလဲ။ ကိုယ်ရို့ ကောင်းခင်ဘုံအထက်မှာ ရောက်နီစွာ အခုထက်ထိမသိကတ်လားဟု နတ်၍သွန်း၍ ပြောမိပါသည်။ တခါတွင် အကျွန်ုပ်ရို့ကျောင်းသားများတဖက် ဇင်မဘောက်ရွာသားများတဖက် ဘော်လုံးကျောက်ဖြစ်ပါသည်။ အကျွန်ုပ်ရို့ကျောင်းသားများ (၇) ဂိုး ဂိုးမဟိ အပြတ် ယှုံးသည်။
အကျွန်ုပ် ဇင်မဘောက်စခန်းတွင်နီခိုက် ဒေါက်တာမန်းမြင့်ဆိုင်က မဏိပူစခန်းမှ လာ၍ သင်တန်းပို့ချပါသည်။ ထိုအချိန်တွင် ယခုနယ်သလန်ရောက် ကိုချိုဇံမှာ မဏိပူ Camp တွင် ဟိသည်။ မှတ်မိနီမိသည်မှာ သင်တန်းတွင် ဒေါက်တာဇော်ဝင်းအောင်နှင့်အကျွန်ုပ် Fighting ချရခြင်းဖြစ်သည်။ ဒေါက်တာဇော်ဝင်းအောင်က တချက်ဆောင့်ကန်လိုက်သည်နှင့် မိမိမှာ တချက်တည်းနှင့် ထိုင်လဲကျလားပါသည်။ သင်းသင်းအောင်ကား မိမ္မသားဆိုသော်ငြားလည်း ယောက်ျားများနှင့်တန်းတူ အလွန်သတ္တိကောင်းသော အမျိုးသမီးဖြစ်ပြီး ဒေါင်ကျကျပြားကျကျခံနိုင်ရည်ဟိသည်။ တော်လှန်ရီးလုပ်ချင်သော အမျိုးသမီးများ စံနမူနာယူထိုက်သည်။ လက်နက်ကိုင်တော်လှန်ရီးအတွက် စိတ်အထက်သန်ဆုံးမှာ ကိုဝင်းထွန်းနှင့် ကိုမြင့်အေးဖြစ်သည်။ ကိုဗလကား နာမည်နှင့်လူနှင့်တခြားစီ အကျွန်ုပ်ကဲ့သို့ ပိန်ပိန်ညှောင်ညှောင်ဖြစ်သည်။ နိုင်ငံရီးအတွေးအခေါ်တောက်ပြောင်သည်။ အကျွန်ုပ်ကြားသိခရသည်မှာ အရေးအခင်းတွင်း မောင်မောင်ကျော်နှင့်အတူ ရှိထွက်တိုက်ပွဲဝင်ခသော ရဲရဲတောက်သူရဲကောင်း ယုယုမော်သည်လည်း ကျင်ဖိုင်းသို့ရောက်လာခကြောင်းကြားသိခရသည်။ ပြန်ထဲသို့ ပြန်ဝင်လားသည်ကိုကား ကောင်းကောင်းစိတ်မကောင်းဖြစ်မိသည်။ ဒူးမထောက်လက်မမြှောက်သူများထဲတွင် အစ်မကြီးဒေါ်မော်လီလည်း ပါဝင်သည်။ ကိုထွေး၊ ကိုထွန်းထွန်း၊ ကိုဇော်ဌေးမှာ မုံရွာဇာတိဖြစ်သည်။ ကိုမိုးကား ကရင်ခရစ်ယာန်ဘာသာဝင်ဖြစ်ပြီး ဘွင်းဘွင်းသမားဖြစ်သည်။ အကျွန်ုပ် အိနိံ္ဒယသို့ ဒုတိယတခေါက်ကူးဖြတ်စဉ် ကိုသန်းမောင်နှင့်အတူ ထရိပူရ ဘောင်းကူးရွာ၌သောင်တင်နီစဉ် ကိုမိုးကိုယ်တိုင်ဆင်းလာပြီး အကျွန်ုပ်ရို့အား ကယ်ထုတ်ခသူဖြစ်သည်။ ယခု ကနေဒါရောက်ပြီးမှ မမျှော်လင့်ဘဲ ကွယ်လွန်လားခပြီးဖြစ်သည်။ ကိုဝင်းထွန်းကား ဘင်္ဂလားနယ်စပ်တွင် လက်နက်ကိုင်တော်လှန်ရီးအတွက် ကွင်းဆင်းစဉ် လုပ်ကြံခြင်းခံလိုက်ရသည်။ အကျွန်ုပ် Aizawl သို့ ပထမတခေါက်ရောက်စဉ် ကိုဝင်းထွန်းအိမ်ထောင်မကျသိမ့်ပါ။ မခေါမီးတူမအား ချဉ်းကပ်နီတုန်းကာလဖြစ်သည်။ ဒုတိယအကြိမ်ရောက်လာသောအခါတွင်ကား အိမ်ထောင်ကျ၍ ဒေလီသို့ရောက်နီပြီးဖြစ်သည်။ န၀ဒရပ်ကွက်တွင် ဦးညွန့်လှ ဒေါ်မော်လီ၊ ကိုဝင်းထွန်းရို့မိသားစု အကျွန်ုပ်ရို့ တရပ်ကွက်တည်းအတူနီခသည်။ မှတ်မိရရ ကိုဝင်းထွန်းက အကျွန်ုပ်အား ဘောင်းဘီတလုံး ၀ယ်ခြုပ်ပီးသည်။ သူက လက်နက်ကိုင်တော်လှန်ရီး ကောင်းကောင်းစိတ်ထက်သန်သည်။ အကျွန်ုပ်က အခြီနီမကောင်း မဆင်းရန်ပြောသည်ကို သူက ပိတ်ဆို့ထားသည်ဟု ထင်သည်။ နောက်ပိုင်း နယ်စပ်သို့ဆင်း၍ လက်တွိကွင်းဆင်းခိုက် လုပ်ကြံခံလိုက်ရသည်။ မည်သည့်အဖွဲ့ဖြစ်သည်ကိုကား အတိအကျမသိ။ အတိအကျမသိဘဲလည်း ချမရွီးချင်ပါ။ နောက် လက်နက်ကိုင်အလုပ်ချင်ဆုံးမှာ ယခုနော်ဝေးရောက် ကိုမြင့်အေးဖြစ်သည်။ အကျွန်ုပ်ဒေလီသို့တက်လာသောအခါ နယ်စပ်၌အခြီနီမကောင်းသည်ကိုကား သတိပီးခပါသည်။ ကျောင်းသားအများစုမှာ အိုက်ဇော၌ ရပ်တည်လျှက် ကျန်ခသည်။ များသောအားဖြင့် ဒေလီသို့တက်သည်ကို ဖောက်ပြန်သူအဖြစ် အစွပ်အစွဲခံရမည်ကို မလိုလားသောကြောင့်ဖြစ်သည်။ အကျွန်ုပ်ကား နယ်စပ်အနီအထားနှင့် ရည်ရှည်ရပ်တည်ရီးကို သဖောပေါက်သဖြင့် ဝေဖန်ကဲ့ရဲ့ခြင်းကိုလွန်ဆန်၍ ကိုသန်းမောင်နှင့်အတူ ဒေလီသို့တက်ပါလာလတ်သည်။ ဓါတ်ပုံထဲက အကျွန်ုပ်ရှိက င်္အကျီအဖြူ အပြာနှင့် ထိုင်နီသူမှာ ကိုယ်တော်သန်းလင်းဖြစ်သည်။ ကိုယ်တော်သန်းလင်းမှာ ကျောက်တော်ဇာတိဖြစ်ပြီး ဘုန်းကြီးဝတ်နှင့်ထွက်လာခြင်းဖြစ်သည်။ ကိုရန်နိုင်နှင့် ကီးမကိုက်သည်များဟိသည်။ ဒေလီသို့တက်လာ၍ နှစ်အင်တန်နီပြီးမှ ဒေလီ၏အပူဒါဏ်ကို မခံနိုင်၍ ပြည်ထဲသို့ ပြန်ဝင်လားသည်။ အချုပ်ခံရပြီး အချုပ်တွင်းနှိပ်စက်ခံရမှုကြောင့် စိတ်လွတ်လားပြီး လမ်းဘေး၌ပင် သီကျလားသည်ဟုသိရသည်။ နီရာကိုကား အတိအကျမသိ။ ကိုလတ်ကား ကရားတေးသမား။ သူ့ဇနီးကား ဒေလီ၌ကွယ်လွန်လားသည်။ ယခု သြစတျေးကို ရောက်နီပြီးဖြစ်သည်။ ကိုဇင်နိုင်ကား နောက်ပိုင်း ABSDF တွင်ဝင်လုပ်သည်။ ယခု ပြည်ထဲဖြစ်သည်။ ကိုဇော်ဌေး၊ ကိုမောင်ငါ၊ ကိုသားကြီး၊ ကိုဝင်းအောင် ယခု သြစတျေးလျသို့ ရောက်နီပြီးဖြစ်သည်။ မိုးချုပ်က VOA တွင် ယခုသတင်းထောက်အဖြစ်လုပ်ကိုင်လျှက်ဟိသည်။ VOA သို့ မပြောင်းခင် RFA ၌ ၀င်လုပ်ခသည်။ ကိုနိုင်မှာ ဗိုလ်ရာဇာရို့ကိစ္စမတိုင်ခင်ကတည်းက Grewal ၏လက်ချက်ဖြင့် မြန်မာစစ်သား (၁၂) ယောက်နှင့်အတူ ဒေလီမှ မြန်မာပြည်သို့ ဖမ်းပို့ခံလိုက်ရသည်။
ကိုရန်နိုင်ကိစ္စအနည်းငယ်ပြောပါမည်။ ကိုရန်နိုင်ကား ရခိုင်ကျောင်းသားအဖွဲ့တိုးတက်ဖို့အတွက် ဖြစ်ချင်စိတ်ကောင်းကောင်းပြင်းပြသူဖြစ်သည်။ ၁၉၉၀ နှစ်က အကျွန်ုပ် Aizawl စရောက်တည်းက ဒေလီသို့လွှတ်ခသည်။ အကျွန်ုပ်ကား ကိုရန်နိုင်စကားကိုနားမထောင်ဘဲ ဘင်္ဂလားသို့တခေါက်ပြန်ဆင်းပြီး မိမိနှင့်တရပ်ကွက်တည်းဖြစ်သူ စံသာအောင်ရို့အား ယုံကြည်မိသဖြင့် ခွီးပြီးဝက်ပြီးပြန်တက်လာခရသည်။ အကယ်၍ အကျွန်ုပ်ရာ ကိုရန်နိုင်စကားကိုလက်ခံပြီး ၁၉၉၀ ခုနှစ်ကတည်းက ဒေလီသို့တက်လာခဖို့ဆိုကေ ရခိုင်ကျောင်းသားအဖွဲ့အစည်း၏အနီအထားမှာ အခုပိုင် အခြီနီဆိုးဝါးဖို့အကြောင်းမဟိပါ။ ဗိုလ်ရာဇာရို့ဆင်းလာပြီး မြန်မာဖက်ခွက်စစ်တပ်က ထိုးစစ်ဆင်သဖြင့် ထွက်ပြီးလာရသောဒုက္ခသည်များကိစ္စ UN ရောက်နိုင်ဖို့ ကိုရန်နိုင်ကပင် မိမိအိပ်စိုက် ငွေများစွာကျခံပီးပါသည်။ နယ်စပ်သို့သူကိုယ်တိုင်ဆင်း၍ မှတ်တမ်းတင်ဓါတ်ပုံများစုဆောင်းပီးသည်။ စိုးဝင်း (ဆွီဒန်)၊ ဘအောင် (ဆွီဒန်)။ လှစော (အမေရိက) ရို့အား ဒေလီသို့ အကျွန်ုပ်မတိုင်ခင် ပို့တင်ပီးခသူမှာ ကိုရန်နိုင်ဖြစ်သည်။ အန္ဒမာန်ကိစ္စ၌ အသီစောလားခရသည်မှာ ကောင်းကောင်းဝမ်းနည်းဖို့ကောင်းသည်။ သို့သော် သူရို့လုပ်ကြံခံလိုက်ရသည်ကိုကား တယောက်ချေကလည်း မြင်လိုက်ရသည်မဟုတ်။ သီနတ်သံကိုကြား၍ စိတ်အထင်ဖြင့် ယမ်းတုတ်ကတ်စွာရာဖြစ်သည်။ အကျွန်ုပ်ယုံကြည်သည်မှာ Grewal ရို့က မြန်မာစစ်တပ်အားလွှဲပြောင်းပီးလိုက်သည်ဖြစ်မည်။ အသတ်ခံကောင်းခံရလျှင် မြန်မာပြည်ရောက်ပြီး တနီရာ၌ သတ်ဖြတ်လိုက်သည်ဖြစ်မည်။ အကယ်၍ သတ်ဖြတ်ခသည်ဟိသော် သတ်ဖြတ်ခသော လူသတ်တရားခံများကိုဖော်ထုတ်၍ လူသတ်မှုဖြင့် တရားစွဲကတ်ရဖို့ဖြစ်တေ။ မကြာခင်က Facebook ထက်တွင် Byala Thukha ပို့တင်လိုက်သောသတင်းအရ ယခင်ထောက်လှမ်းရေးဟောင်းတယောက်ပြောပြ၍ ဗိုလ်ရာဇာလည်း ပြည်ထောင်ထဲတွင် အသက်ရှင်လျှက်ဟိသိမ့်ကြောင်းသတင်းရသည်။ ဤသတင်း ကောင်းကောင်းယုတ္တိဟိသည်။ ဤသတင်းကို ရခိုင်သားများပေါ့ပေါ့တန်တန်မနီသင့်။ အပူတပြင်းစုံစမ်းသင့်သည်။ ကိုရန်နိုင်နှင့် ကိုစောထွန်းလည်း အသက်ရှက်လျှက်ဟိကောင်းဟိနိုင်သည်။ ဗိုလ်ခင်ညွှန့်ကိုဖြုတ်ချပြီးနောက် အဖြုတ်ခံရသော ထောက်လှန်ရေးဟောင်းများကိုချဉ်းကပ်လျှင် သတင်းအတိအကျ အသေးစိတ်ရနိုင်စရာအကြောင်းဟိသည်။ ပြည်ထဲကလူများရာ ဆောင်ရွက်နိုင်သောကိစ္စဖြစ်၍ ပြည်ထဲဟိ မျိုးချစ်ပြည်ချစ်များ အိပ်ငိုက်မနီသင့်ပါယာ။ ယခုအချိန်လောက်ဆိုလျှင် Grewal ၏ဓါတ်ပုံလည်း Internet ထက်ရောက်သင့်စွာကြာယာ။ ဇာဖြစ်မတက်လာသိမ့်စွာလဲ။ Grewal ကို နောက်ယောင်ခံမလိုက်ပဲ ဇာဖြစ်အေအတိုင်းလွှတ်ထားကတ်စွာလဲ။ သွီးအီးလားခလို့ မိလားခကတ်စွာလား။ ရခိုင်သွီးက ကောက်ရိုးမီးလား။ မီးခွန်းပေါင်းမြောက်များစွာတက်လာသည်။ ဇတ်လိုက်တိက ဇတ်ကြည့်နီကတ်တေခါ ပရိဿတ်က အိုးမပူပဲ ခွက်ပူယှောင်ဖြစ်နီရေ။
ဇင်မဘောက်စခန်းတွင်နီပြီးမှ အကျွန်ုပ် ကိုရန်နိုင်ရို့အိမ်တွင်လားနီပါသည်။ ထိုအချိန်က ကိုရန်နိုင်နှင့် ကိုဇားယာမှာ တအိမ်တည်း တတူနီသည်။ Bara Bazar လမ်းမအထက်ဖက်ခြမ်း Top Resturant နှင့်ကပ်လျှက် ကိုရန်နိုင်ရို့ ရေဒီယို ပြုပျင်ဆိုင်ဟိသည်။ အတက်အဆင်းလှီကားထစ်တခုရာ ခြားသည်။ ကိုဇားယာမှာ မြန်မာပြည်က မီဇူလူမျိုးဖြစ်သည်။ ကိုရန်နိုင်ရို့အိမ်တွင်နီစဉ် ဒေါက်တာဇော်ဝင်အောင်၊ သင်းသင်းအောင်ရို့ ဒေလီသို့လားခိုက်ကြုံသဖြင့် ကိုရန်နိုင်က အကျွန်ုပ်အား ဒေလီသို့ လိုက်ပါလားစီချင်သည်။ အကျွန်ုပ်က မားပါရာကို လားချင်သောဆန္ဒ၊ ဘင်္ဂလားသို့ပြန်၍ ရခိုင်ကျောင်းသားများနှင့် အဆက်အသွယ်လုပ်ချင်သည့်ဆန္ဒဟိသည်ဖြစ်၍ မားပါရာသို့ ခရီးတခေါက်ထွက်ဖြစ်လိုက်သည်။ အကျွန်ုပ်မီဇူရမ်သို့ရောက်လားချိန်တွင် ကိုမြတ်သူနှင့် ကိုကျော်သန်းမှာ ဒေလီသို့ ရောက်နှင့်ပြီးဖြစ်သည်။
မားပါရာသည် မီဇူရမ် ဘင်္ဂလားနယ်စပ် သက်ရွာချေတရွာဖြစ်သည်။ ကျောင်းထိုင်ဆရာတော်မှာ ရခိုင့်တော်လှန်ရီးရဲဖော်ဟောင်းတဦးဖြစ်သည်။ မီဇူရမ်ပြည်နယ် ကိုယ်ပိုင်အုပ်ချုပ်ခွင့်အတွက် တိုက်ပွဲဝင်ခသော MNF အဖွဲ့၏လက်ဟိဥက္ကဌဇိုးရမ်းထန်းငါနှင့် လုပ်ဖော်ကိုင်ဖက်ဖြစ်သည်။ သူ့အား ဆံရှည်ကိုယ်တော်အဖြစ်လူသိကြောင်းပြောပြပါသည်။ သူ၏သားသိန်းအောင်သည်လည်း အကျွန်ုပ်အယင် ဇင်မဘောက်စခန်း၌ လာနီခကြောင်း ကျောင်းသားများပြောပြ၍ သိရသည်။
အကျွန်ုပ်တယောက်တည်း ခရီးလားပါသည်။ ဘာ့စ်ကားရောက်သည့် နောက်ဆုံးမြို့ကိုရောက်၍ ထိုမှတဆင့် မားပါရာသို့ (၁၀) မိုင်လောက် ခြီကျင်လျှောက်ရသည်။ ခြီကျင်လျှောက်ရသည်မှာ မြီပြန့်မဟုတ် တောင်ကြောလမ်းအတိုင်း ခြီကျင်လျှောက်ရခြင်းဖြစ်သည်။ ဖြတ်လမ်းသိလျှင် ပိုနီးသည်ဟုဆိုသော်လည်း အကျွန်ုပ်ကား ဖြတ်လမ်းမသိသဖြင့် ကားလမ်းအတိုင်းလျှောက်သည်။ လမ်းတွင် လမ်းပျင်နီသော ဒုံးကလားများနှင့် အိန္ဒိယရဲသားတချို့ကို တွိရသည်။ အကျွန်ုပ်ကား အဆင်းဖြစ်၍ ယင်းလောက်ထိ အစစ်အဆီးမဟိ။ နယ်စပ်ကတက်လာလျှင် ပိုစစ်သည်ဟုသိရသည်။ ရဲသားများကို ခပ်တည်တည်ဖြင့် နှုတ်ဆက်ပြီး မားပါရာသို့ တယောက်တည်းပေါက်ချပါလတ်သည်။
ဆရာတော်မှာ အသက်အရွယ်ကြီးရင့်ပြီးဖြစ်သော်လည်း အနည်းငယ်သတိလွတ်တတ်သည်မှအပ နိုင်ငံရီးအတွေးအခေါ်အမြော်အမြင်ဟိသည်။ BBC သတင်းများကိုလည်း မလွတ်တန်းနားထောင်သည်။ အကျွန်ုပ်ရို့ကား တော်လှန်ရီးလုပ်နီပါသည်ဆိုသော်လည်း BBC နားမထောင်ဖြစ်။ အကျွန်ုပ် ဒေလီသို့ရောက်ပြီးနောက်ပိုင်း ဆရာတော်ကြီးကိုယ်တိုင် အိုက်ဇောသို့လာရောက်၍ ထိုစဉ်က MNF ပြန်လည်၍ အောင်ပွဲခံပြီး ဇိုးရမ်းထန်းငါ မီဇူရမ်ဝန်ကြီးချုပ်ဖြစ်စဉ် ဆရာတော်ကိုယ်တိုင်လားတွိကြောင်းကြားသိရသည်။ ဆရာတော်အား Aizawl တွင်ကျန်ခသော ကျောင်းသားများ၊ NLD အဖွဲ့ဝင်များက ကိုးကွယ်ထားသည်။ ယခုအချိန်တွင် ပျံလွန်တော်မူပြီးဖြစ်မည်။ မည်သည့်နီရာ၌ပျံလွန်တော်မူသည်ကိုကား မကြားသိလိုက်ပါယာ။ ဆရာတော်ကျောင်းထိုင်ရာ မားပါရာတွင် ရခိုင်ပြည်မှလူကြီးတယောက်လည်း သက်အမျိုးသမီးတဦးနှင့် အိမ်ထောင်ကျလျှက်ဟိသည်။ သူက MNF ပါတီဝင်အဖြစ် သစ္စာဟိစွာရပ်တည်သည်။ အကျွန်ုပ် ဒုတိယအကြိမ်မြောက် Aizawl သို့ လားရောက်သည့်အချိန်တွင် Aizawl ၌ သူ၏မိသားစုကို တွိခရသည်။ သားအကြီးသူမှာ ဆယ်တန်းဖြေထားကြောင်းပြောသည်။
အကျွန်ုပ် မားပါရာ၌ တပါတ်လောက်နီပြီး အများမကြာ ကိုရန်နိုင်က စိတ်မချသဖြင့် ပေါက်ချပါလတ်သည်။ အပြန်တွင် ကိုရန်နိုင်နှင့် နှစ်ယောက်တတူပြန်သည်။ လမ်းမြို့တမြို့တွင် ခေတ္တနားစဉ် လူမိုက်ဆန်ဆန်လူတယောက်က ပြဿနာရှာသည်။ အကျွန်ုပ်ရို့က Aizawl ကလာကြောင်း ပြောပြသော်လည်းလက်မခံ။ မနည်းဖျောင်းဖျပြောဆိုရသည်။ စိတ်ထဲမှာ နောက်တခေါက် ၀င်ရယာလားမသိ အောင့်မိမိသည်။ နောက်တခေါက်ဝင်ကေက သက်သာဖို့မဟုတ် ထောင်ကျကောင်းကျနိုင်သည်။ နောက်ပိုင်း လူမိုက်က စိတ်ကောင်းဝင်ပြီး ပြန်လွှတ်လိုက်သည်။ သို့ဖြင့် ကိုရန်နိုင်နှင့် အကျွန်ုပ်နှစ်ယောက် အဖမ်းမဆီးမဟိ Aizawl သို့ ပြန်ရောက်လာလတ်သည်။
မီဇူရမ်၌နီရသည်မှာ ကောင်းကောင်းပျော်ဖို့ကောင်းသည်။ ရာသီဥတုကောင်းမွန်သောကြောင့်ဖြစ်သည်။ အစားအသောက်လည်းပေါသည်။ မီဇူးဝက်သားဆိုလျှင် အိမ်၌အထူးမွီးစပ်ထားသည်ဖြစ်၍ မုံညင်းဟင်းနှင့်ရောပြုတ်လျှင် ဆွီမျိုးမိလောက်အောင်ကောင်းသည်။ မီဇူးဟင်းရည်မှာ မုံညင်းကို ဆားအနည်းငယ်ခပ်လျှက် ရီလုံပြုတ်ထားခြင်းဖြစ်သည်။ အစတွင် သောက်၍ လုံးဝအရသာမတွိ။ နောက်ပိုင်း တဖြည်းဖြည်း သဘာဝအရသာကိုပင် တမ်းတမ်းစွဲဖြစ်လာသည်။ ၄င်း မီဇူးဟင်းရည်ကြိုက်လားပြီးဆိုလျှင် ဟင်းချိုမှုန့်အရသာကို လှည့်မကြည့်ချင်လိုက်ယာ။ မြန်မာပြည်က လူများမှာကား အသိဥာဏ်ခေါင်းပါး၍ ယခုထက်ထိ ဟင်းချိုမှုန့်ကို စားသုံးလျှက်ဟိသည်။ သို့ဖြင့် အသက် (၄၀) မကျော် မရဏနှင့် ဈာန်ကြွလားသည်က များသည်။ သတိရ၍ သတင်းမီးသောအခါ အကျွန်ုပ်နှင့်ကျောင်းနီဖက်သူငယ်ချင်း တယောက်ချေလည်း အသက်ရှင်လျှက် မဟိလိုက်ပါယာ။ တယောက်နှစ်ယောက်ရာ ကျန်ပြီးဖြစ်သည်။ အန်ဒရိန်းခပ်ထားသော ရခိုင်တောအရက်သောက်သည်ထက် ဟင်းချိုမှုန့်စားသုံးသောကြောင့်ဖြစ်သည်။
မီဇူရမ်၌ကောင်းမွန်သည်မှာ မီဇူအသံလွှင့်လှိုင်းကို (၂၄) နာရီ အသံလွှင့်ခွင့်ရသည်။ မီဇူး (TV) (24) နာရီရသည်။ လျပ်စစ်မီး (၂၄) နာရီရသည်။ မီဇူဘာသာစကားကိုလည်း တက္ကသိုလ်တန်းအထိ သင်ကြားခွင့်ရသည်။ အသေးစားစီးပွားရီးနှင့် အိုးအိမ်စီမံကိန်း နှစ်ရှည်ချီးငွေများ အစိုးရပါးက လုံလုံလောက်လောက်ရဟိသည်။ ဆီးတက္ကသိုလ်၊ အင်ဂျင်နီယာလိုင်းများအတွက် ပြည်နယ် Quota နှင့် ပြည်နယ်ထောက်ပံ့ကြေး Scholarship ဟိသည်။ မြို့တွင်း အုပ်ချုပ်ရီးယန္တရားပိုင်းတွင်လည်း အားလုံးမီဇူလူမျိုးများဖြစ်သည်။ မြန်မာပြည်မှာကဲ့သို့ ဖက်ခွက်စစ်တပ်က နီရာတက ဗိုလ်ကျ၍မရ။ ကိုယ်ပိုင်အုပ်ချုပ်ခွင့် အတိုင်းအတာတခုအထိ အပြည့်အ၀ရဟိသော ပြည်နယ်တခုဖြစ်သည်။ မီဇူးလူမျိုးများ မီဇူရမ်ပြည်နယ်၏လမ်းပန်းဆက်သွယ်ရီးကို ခက်ခက်ခဲခဲတည်ဆောက်ထားကတ်သည်။ မီဇူရမ်ပြည်နယ်၏အခက်အခဲနှင့်နှိုင်းစာလျှင် ရခိုင်ပြည်၏လမ်းပန်းဆက်သွယ်မှုအခက်အခဲမှာ ဟာသဖြစ်လားသည်။ မီဇူးလူမျိုးများ၏ဇွဲလုံ့လနှင့် စည်းလုံးညီညွတ်မှုကို အာရီယံနွယ်ကဆင်းသက်လာသည်ဟုဆိုသော ရက္ခိတရခိုင်သားများ ခြီဖျားတောင်လိုက်မှီဖို့မထင်။
အကျွန်ုပ် Aizawl သို့ ဒုတိယအကြိမ်ရောက်ခစဉ်ဟုထင်သည် ကိုဗလ၏သူငယ်ချင်း မြန်မာပြည်ကမီဇူးအမျိုးသမီးတဦး (နာမည်မမှတ်မိ) က အဆက်အသွယ်လုပ်ပီး၍ ကိုဗလနှင့် ကျွန်တော်နှစ်ယောက် မီဇူရမ်းတော်လှန်ရီးခေါင်းဆောင်ကြီး MNF ဥက္ကဌ ဇိုးရမ်းထန်းငါနှင့် သူ၏အိမ်တွင် လူချင်းလားတွိဖြစ်လိုက်ပါသည်။ ယင်းအချိန်က Mizoram ၌ Congress ပါတီ အနိုင်ရလျှက်ဟိပြီး MNF မှာ အတိုက်အခံအဖြစ် ရပ်တည်လျှက်ဟိသည်။ မီဇူရမ်တွင်နီထိုင်စဉ်ကာလအတွင်း အကျွန်ုပ်လည်း မီဇူတော်လှန်ရီးခေါင်းဆောင်ကြီး ဇိူးရမ်းထန်းငါကိုအားကျ၍ မိမိကိုယ်ကိုမိမိ ဇိုးမှတ်ငိုင်ယာဟု နာမည်ခံယူလိုက်သည်။ အစ်မမစမ်းပွီးက ၄င်းနာမည်ပီးပါသည်။ အဓိပ္ပါယ်မှာ မီဇူးလူမျိုးများအားချစ်သောသူဟူ၍ အဓိပ္ပါယ်ရသည်။
မီဇူရမ်ပြည်နယ်နှင့်ပါတ်သက်၍ထူးခြားသည်မှာ မီဇူရမ်ပြည်နယ် သမိုင်းသုတေသနဌာနက အင်္ဂလိပ်လက်ထက်က ထုတ်ပြီးသား ယှားပါးစာအုပ်များကို ပြန်လည်ထုတ်ဝီခြင်းဖြစ်သည်။ အတွင်းရေးမှုးဦးခင်မောင် နယ်စပ်၌ ရခိုင်ဒုက္ခသည်များကိစ္စဆောင်ရွက်ပြီး တက်လာသောအခါ လက်ထဲ၌ မီဇူရမ်ပြည်နယ် သမိုင်းသုတေသနဌာနက ထုတ်ဝီသော စာအုပ်အင်ထန်များများပါလာလတ်သည်။ မှတ်မှတ်ရရစာအုပ်မှာ "The Wild Races of Chittagong Hill Tract" ဖြစ်သည်။ ၄င်းစာအုပ်တွင် စစ်တကောင်းတောင်တန်းနယ် လူမျိုးများအားလုံးတွင် ကိုယ်ပိုင်စာအက္ခရာဟိသည့်လူမျိုးမှာ ဤလူမျိုးတမျိုးတည်းသာဟိကြောင်း။ မိမိကိုယ်ကိုမိမိ (မရမာ) ဟုခေါ်ကြောင်းဖော်ပြထားသည်။ ထို့ကြောင့် ရခိုင်ပြည်မှ သမိုင်းသုတေသီများ ဒီမိုကရေလမ်းကြောင်းပွင့်လာလျှင် မီဇူရမ်ပြည်နယ် ပညာရီးဌာနနှင့်အဆက်အသွယ်လုပ်ပြီးလျှင် ပညာရီးဆိုင်ရာ သမိုင်းသုတေသနဆိုင်ရာ သုတေသနလုပ်ငန်းများကို ပူးပေါင်းဆောင်ရွက်သင့်သည်။ ထိုစာအုပ်တွင် ထူးခြားသည်မှာ ရခိုင်လူမျိုးတဦး မီဇူရွာသူကြီးအိမ်တွင်နီသည်။ စာရွီးသူက ရာဇ၀တ်မှုကြောင့်ထွက်ပြီးလာသည်ဟု ယူဆသည်။ တရက်နိ မီဇူးရွာသားများ (ရခိုင်သားအပါအ၀င်) ဆီးဆာဖက် ဘင်္ဂလီကုလားရွာသို့လား၍ ဓမြတိုက်သည့်အကြောင်းမှာလည်း စိတ်ဝင်စားစရာကောင်းသည်။
အကျွန်ုပ် ထိုင်းမှပြန်ရောက်ပြီး ရက္ကန်း Project ဖြင့် မီဇူရမ်သို့ တတိယတခေါက်လားသည့်အခါ ရက္ကန်းခတ်နီသော အထွန်းချေရို့ညီအစ်ကိုနှစ်ယောက်၊ နောက်တယောက်၊ သိန်းထွန်း၊ နောက်တယေက် စုစုပေါင်း ရခိုင်သား ငါးယောက်ဟိသည်။ အထွန်းချေ၏အစ်ကိုမှာ ကျောက်တော်မှ အိုက်ဇောသို့အလုပ်လာလုပ်သူ ရခိုင်သားအစ်ကိုကြီးတယောက်၏သမီးနှင့်အိမ်ထောင်ကျလျှက်ဟိသည်။ အစ်ကိုကြီး၏ညီဖြစ်သူမှာ မြို့နယ်လ၀ကမှုးဖြစ်ပြီး အကျွန်ုပ်ရို့နှင့် တရပ်ကွက်တည်းဖြစ်သဖြင့် ကောင်းကောင်းသိသည်။ တရက်နိ (၉) ချက်တီးလောက်တွင် အထွန်းချေ၏အစ်ကိုက အကျွန်ုပ်ရို့နီရာအိမ်သို့ သူ့သူငယ်ချင်းများနှင့်ပေါက်ချပါလတ်ပြီး (နန္ဒရာသီး) ခွဲစားကတ်သည်။ ညည့်တချက်တီး နှစ်ချက်တီးလောက်တွင် အစ်ကိုသီဆုံးလားပြီဖြစ်ကြောင်း တန်းခါးလာခေါက်သည်။ အသက်လျှူလီပြွန်ပိတ်၍ ရုတ်တရက်သီဆုံးလားခြင်းဖြစ်သည်။ ညည့်သန်းခေါင်တွင် Taxi များလည်း လိုက်ရှာမရ။ ဆီးရုံပို့ဖို့ အချိန်မရလိုက်ပဲ ချက်ချင်းအသက်ကပ်ပါလားသည်။ အနိစ္စ၊ ဒုက္ခ၊ အနတ္တတရားကို တော်လှန်ရီးလုပ်ခါမကြုံရ၊ ရက္ကန်းခတ်ခါမှ ကြုံရသည်။ မယားသည်မှာ ကိုယ်ဝန်အရင့်မာဖြင့်ကျန်ခပြီး အချေမှာ ယခုဆိုလျှင် အသက်နှစ်ဆယ်ကျောက်လောက်ပြီးဖြစ်မည်။ မီဇူရွာသူရွာသားများ လူကြီးလူငယ်အားလုံး အလွန်အားကိုးရသည်။ အလောင်းမြီကျအောင်ထိ အစစအရာရာ ကူညီပီးကတ်သည်။ နာရီးကိစ္စပြီး၍ ရက်များမကြာ ရက္ကန်းစင်ထောင်သည်မှ ပွဲဦးထွက် အထည် (၅) ထည်ထွက်သည်။ ကိုအထွန်းချေအား ရောင်းခိုင်းရာ အံစာထိုး၍ အားလုံးတက်တက်ပြောင်သည်။ ကန္တုကန္တာနမိတ်မကောင်းသည်ဖြစ်၍ အကျွန်ုပ်လည်း စိတ်ပျက်ပျက်နှင့် ရက္ကန်း Project ကို တပ်ခေါက်ပြီး ဒေလီသို့ပြန်တက်ပါလတ်ရသည်။ (ဆက်ရန်)

မီဇူရမ်သို့

မီဇူရမ်သို့
=====
သက်ဘုန်းတော်ကြီးကျောင်းတွင် နှစ်ရက် သုံးရက်နားပါသည်။ လမ်းစရိတ်အတွက် အကူအညီတောင်းခံရသည်။ ဆရာတော်မှာ ရခိုင်ပြည်က စာတတ်ပီတတ်ရဟန်းတပါးဖြစ်သည်။ သက်ထုံးစဉ်အရာ တစုံတဦးသီလျှင် သီသူပိုင်ဆိုင်သည့် နွားကိုသော်လည်းကောင်း ဘုန်းကြီးကျောင်းသို့ ပီးလှူတတ်သည်။ ကုန်ခသည့်နှစ်မိုးဦးကျက ကာလ၀မ်းရောဂါလိုက်၍ လူပေါင်း (၄၀) ကျော်သီဆုံးကြောင်းဆရာတော်က ပြောပြ၍သိရသည်။ လှူဒါန်းထားသောအလှုများကိုပြ၍ မသုံးဆောင်အပ်သောအလှူဟူ၍ ပြောပြပါသည်။ ဆရာတော် မီဇူရမ်ပြည်နယ်က ခရစ်ယာန်ပြည်နယ်ဖြစ်လို့ ဘုန်းကြီးဝတ်နှင့်မသင့်တော်ပါ။ ရွာသားများပါးက လူအ၀တ်တစုံလောက် တောင်းခံပီးပါဟုပြောသော်လည်း ဆရာတော်မှာ ကူညီလိုစိတ်မဟိ။ မောင်သျှင်ဝတ်နှင့်ဆိုကေကား ကိစ္စမဟိ။ အခု ရဟန်းရဟန်းခံ၍လာသဖြင့် လူဝတ်ချွတ်မပီးချင်။ ထို့ကြောင့် ဘုန်းကြီးဝတ်နှင့်ပင်လျှင် အကျွန်ုပ် မီဇူရမ်သို့ ခရီးဆက်ရပါသည်။
အကျွန်ုပ်ရို့စီးသော ဘာ့စ်ကားတွင် သက်လူမျိုး လေးငါးခြောက်ယောက်ပါသည်။ သူရို့လည်း Aizawl သို့လားမည်ဆိုသဖြင့် Aizawl ရောက်လျှင် သက်ဝန်ကြီးအိမ်သို့လိုက်ပို့ပီးပါဆို၍ သက်ဝန်ကြီးအိမ်သို့ လိုက်ပို့ပီးပါသည်။ သက်ဝန်ကြီးနှင့်တွိသောအခါ အကျွန်ုပ်က မြန်မာပြည်မှ ကျောင်းသားဖြစ်ကြောင်း၊ Aizawl တွင် ကျောင်းသားစခန်းဟိကြောင်း၊ ကျောင်းသားစခန်းသို့ ပို့ပီးပါဟု အကူအညီတောင်းသည်။ အမှန်မှာ ကျောင်းသားစခန်းကား Aizawl ၌ဟိသည်မဟုတ်။ Aizawl နှင့် မိုင် (၁၆၀) ခန့်ဝီးသော နယ်စပ်မြို့တမြို့ဖြစ်သော ကျင်ဖိုင်း၌ ဖွင့်လှစ်ထားခြင်းဖြစ်သည်။ သို့သော် သက်ဝန်ကြီးကား အကျွန်ုပ်အား ကျောင်းသားစခန်းသို့ မပို့ပီး။ အချုပ်ခန်းသို့ တန်းပို့လိုက်သည်။ အချုပ်ခန်းသို့ရောက်နီသော်လည်း အကျွန်ုပ်ကား အဖမ်းခံရမှန်းမသိ။ အချုပ်ခန်းမှန်းမသိ။ ကျောင်းသားစခန်းသို့လိုက်ပို့ပီးမည့်ကားကို စောင့်နီသည်။ နောက် အင်တန်လောက်ကြာမှ ရဲစခန်းမှုးကလာလတ်ပြီး ပဇာကြောင့် အဖမ်းခံရသနည်းမီးသည်။ အကျွန်ုပ်ကလည်း အဖမ်းခံရသည်မဟုတ်။ ကျောင်းသားစခန်းသို့လိုက်ပို့ပီးမည့်ကားစောင့်နီသည်ဟု ပြောလိုက်သည်။ ယင်းခါမှ မဟုတ်။ မင်းအဖမ်းခံရရေ။ အေနီရာက အချုပ်ရဲစခန်း ယှင်းပြပြီးမှ အကျွန်ုပ်လည်း အဖမ်းခံလိုက်ရပြီးဖြစ်ကြောင်း သိနားလည်လိုက်သည်။ ၄င်းညတွင် အကျွန်ုပ်အား အချုပ်ခန်းသို့သွင်းချုပ်လိုက်ပြီး အချုပ်သားများနှင့်အတူ ရောအိပ်ရပါသည်။
နောက် တရက်နှစ်ရက်လောက်ကြာလျှင် အကျွန်ုပ်အား Aizawl ရဲထောက်လှမ်းရေးမှ လာစစ်ပါသည်။ ဘာသာပြန်လုပ်ပီးသူမှာ အစ်မမစမ်းပွီးဖြစ်သည်။ အန္ဒမန်ကျွန်း၌အသတ်ခံလိုက်ရသူ ကိုရန်နိုင်နှင့် ရင်းနှီးသူဖြစ်သည်။ အကျွန်ုပ်လက်ထဲ၌ ခရစ်ယာန်ဓမ္မသစ်ကျမ်းစာအုပ်နှင့် မြိုတောင်ခရီးလားစဉ်က အတိုကောက်ရွီးမှတ်ထားသော မှတ်တမ်းစာရွက်များပါသည်။ ယင်းမှတ်တမ်းတွင် နိရက်အတိအကျပါသည်။ Aizawl ရဲထောက်လှမ်းရေးများက သိမ်းယူထားလိုက်သည်။
Aizawl အချုပ်ခန်းထဲတွင် တလခွဲလောက် အချုပ်ခံရသည်။ အကျွန်ုပ်အဖမ်းခံရသည့်အချိန်မှာ ဆောင်းခါသားဖြစ်သဖြင့် ကောင်းကောင်းချမ်းသည်။ သင်္ကန်းပါးပါးတထည်ဖြင့် မလုံလောက်။ အချုပ်ခန်းထဲတွင်ဟိသော ပုဆိုးမှာလည်း ဘောက်သာဆိုး ခြီသုတ်ဟပ်ထက်ဆိုးသည်။ ဇာမျှနှစ်ကတည်းက မဖွတ်မလျှော်ပဲထားသည်မသိ။ အစိုနံသည်ကား ကောင်းကောင်းဆိုးသည်။ သို့သော် ချမ်းအားကြီးလာသောအခါ မတတ်နိုင် နှာခေါင်းပိတ်ပြီးဆွဲချုံလိုက်ရသည်။ စိတ်ထဲတွင်ကား အော့ချင်အန်ချင်စိတ်ပေါက်သည်။ အချုပ်ခန်းထမင်းမှာလည်း အာလူးတလုံးနှစ်လုံး ပဲဟင်းရည်ကြဲကြဲ မ၀ရေစာစားရသည်။ ကြာလာလျှင် စိတ်ဓါတ်ကျသည်က တကြောင်း၊ အစားပျက်သည်က တကြောင်း၊ ရာသီဥတုဆိုးသည်က တကြောင်း လူက ချက်ချင်းပိန်ကျလားသည်။
အကျွန်ုပ်အားထားသည့် အချုပ်ခန်းထဲတွင် အကျွန်ုပ်အယင် အချုပ်သား လေးယောက်ဟိသည်။ သို့သော် သူရို့ကား တရက်နှစ်ရက်လောက်ကြာလျှင် ပြန်ထွက်လားသည်က များသည်။ တပါတ်နှစ်ပါတ်လောက်ကြာလျှင် အကျွန်ုပ်အယင် ရောက်နှင့်ပြီးဖြစ်သော အချုပ်သားများအားလုံး ပြန်ထွက်လားကတ်ပြီး အကျွန်ုပ်မှာ တလမကြာ အချုပ်ခန်းထဲတွင် သက်တမ်းအရင့်ဆုံးဖြစ်လာသည်။ များသောအားဖြင့် အချုပ်သားများအား အိမ်မှထမင်းလာပို့ကတ်သည်။ ထမင်းဟင်းနှင့်အတူ ငုံဆီးဗူးတဗူးလည်းပါလာတတ်သည်။ ၄င်း ငုံဆီးဗူးအား ၀ိုင်းပတ်လည်၍ တယောက်တလှည့် လက်ဆင့်ကမ်း ပီးငုံလေ့ဟိသည်။ အကျွန်ုပ်အား ကျော်ကျော်လားသည်။ အကျွန်ုပ်စိတ်ထဲမှာ ဟင်းရည်ဟုထင်သည်။ အေသူရို့တိ ငါ့ကိုကျမပီး ကျော်ကျော်လားကတ်တေ စိတ်ထဲမှာ ကသိကအောက်ခံရသည်။ တရက်နိ အကျွန်ုပ်၏မျက်နှာ အမူအယာပျက်နီ၍လားမသိ တယောက်က ၄င်း တွီးဗူး ငုံဆီးဗူးကို ပီးငုံခိုင်းသည်။ အကျွန်ုပ်လည်း ဟင်းရည်ထင်၍သောက်ချလိုက်သည်။ မခံရခက်လိုက်သည်မှာ မပြောကဲ့။ ပြန်ထုတ်၍လည်းမရ၊ မျိုချ၍လည်းမရ လိုင်ခြောင်းဝမှာ ဆို့နီသည်။ အနံ့ဆိုးလိုက်သည်ကားလည်း တမျိုး။
အဆိုးဆုံးအချိန်ကား တရားယုံးသို့ ယုံးချိန်းလားရသောအချိန်ဖြစ်သည်။ မိမိအလှည့်မရောက်ခင် ယာယီအချုပ်ခန်းထဲ၌ ထောင်သားများနှင့်အတူနီရသည်။ ထောင်သားများမှာ များသောအားဖြင့် ရာဇ၀တ်အပြစ်သားများဖြစ်၍ လူ့အသိစိတ်မဲ့ကင်း မိုက်မဲသူများဖြစ်သည်။ တိရိစ္ဆာန်နှင့် ထူးမခြားနားဖြစ်သည်။ အကျွန်ုပ်အမှုမှာလည်း ထောက်လှန်းရေးဟု စွပ်စွဲခံထားရသဖြင့် အမှုကြီးဖြစ်နီသည်။ လူကလည်း ခေါင်းတုံးတုံးနှင့် သင်္ကန်းဝတ်နှင့်ဖြစ်နီ၍ နဖူးကို ခြီတင်လျှက် ခြိမ်းခြောက်လိုက် ကန်ကျောက်လိုက် အမျိုးမျိူးနှိပ်စက်ခြင်းခံရသည်။ ယုံးချိန်းလားတိုင်း ငရဲကျရေပိုင်ခံစားရသည်။ သုံးခေါက် ယုံးချိန်းလားပြီး မြန်မာပြည်သို့ပြန်ပို့ရန် အမိန့်ချလိုက်သည်။
အကျွန်ုပ်အား ပြန်ပို့သည့်ကားမှာ မြန်မာလုံထိမ်းရဲများသုံးသော အချုပ်ကားအတိုင်း သံထူပြားကာလျှက် သံချောင်းစိုက်ထားသော လီဝင်ပေါက်ဖွင့်ထားသော ကားမျိုးဖြစ်သည်။ အကျွန်ုပ်နှင့်အတူ မြန်မာပြည်သို့ပြန်ပို့ခြင်းခံရသော ချင်းလူငယ် သစ်ခိုးသမား (၆) ယောက်ပါသည်။ အကျွန်ုပ်ကား ကျမ္မာရီးအခြီနီမကောင်းသဖြင့် ကားလှူးတိုင်း ကားဆောင့်တိုင် ခေါင်းမူးလာသည်။ ချင်းလူငယ်များကို တဖက် အတူထိုင်ခိုင်းပြီး အကျွန်ုပ်တယောက်တည်းတဖက် ထိုင်ခုံထက်၌ ၀မ်းလျားမှောက်၍လိုက်ရသည်။ လမ်းခုလပ်မြို့ချေတမြို့တွင် တညအိပ်ရသည်။ လမ်းပျက်နီ၍ဟု သိရသည်။ ၄င်း အချုပ်ခန်းအိမ်သာမှာလည်း ပိတ်ပြီးလောက်တက်နီသဖြင့် အနံ့ဆိုးလိုက်သည်ကား အလှိုင်းလှိုင်း အလှိုင်းလှိုင်းတက်သည်။ ခေါင်းမူးသည်က တကြောင်း၊ အနံ့ဆိုးသည်က တကြောင်း သီချင်စိတ်ပေါက်သည်။ နောက်နိမိုးထ ကျင်ဖိုင်းသို့ အချုပ်ကားဖြင့်ဆက်ပို့သည်။ မြန်မာရဲလက်ထဲသို့ကားမအပ်၊ နယ်စပ်ကားလမ်းမတွင် ချထားပီးခသည်။ ချင်းလူငယ်များထဲက နှစ်ယောက် ကျောင်းသားစခန်းအားသိသည်ဆို၍ လိုက်ပို့ပီးသည်။ (၄၅) မိနိခန့်လမ်းလျှောက်ပြီးမှ ကျောင်းသားစခန်းသို့ရောက်သည်။ ကျောင်းသားစခန်းသို့ရောက်သောအခါ စခန်းတွင်းတွင် လူများများစားစာမဟိ။ လေးငါးခြောက်ယောက်လောက်ရာဟိသည်။ မြန်မာတယောက်အား ထောက်လှမ်းရေးစွပ်စွဲပြီး လူသတ်မှုဖြစ်ထားသဖြင့် ကျောင်းသားအားလုံးအပြင်သို့ထုတ်လိုက်ကြောင်း နောက်မှ ကြားသိရသည်။ မြန်မာကျောင်းသားအားလုံးမှာလည်း Aizawl သို့ ထွက်လားခကတ်ပြီးဖြစ်သည်။ စခန်းတွင်းတယောက်က ကျင်ဖိုင်းတွင် ကိုစိန်ဝင်းဟုခေါ်သော မြန်မာကျောင်းသားများအား ကူညီပီးသူတဦးဟိကြောင်း လမ်းညွှန်ပီးလိုက်သည်။ အကျွန်ုပ်ရောက်လားသည်မှာ လမ်းညွှန်ပီးလိုက်သော ကိုစိန်ဝင်းမဟုတ်ပဲ ရက္ကန်းခတ်နီသော ကိုစိန်ဝင်းလင်မယားအိမ်သို့ရောက်လားသည်။ လင်မယားကား မြန်မာပြည်မှလာရောက်ပြီး ဆင်းဆင်းရဲရဲရက္ကန်းခတ်စားနီသူများဖြစ်သည်။ ယင်းတွင် တညအိပ်ပြီး နောက်နိ Aizawl သို့ ကုန်တင်ကားဖြင့် လမ်းကြုံစီး၍ လိုက်ပါလာရသည်။ လမ်းစရိတ်ကို သူရို့ပါးက မရမကခြစ်ကုတ်၍ တောင်းယူခရသည်။ သူရို့လက်ထဲမှာလည်း တပြားတချပ်မဟိ။ သူများပါးက ချီးငှားပီးလိုက်သည်။ လမ်းစရိတ်ကားလုံလုံလောက်လောက်မဟုတ်၊ လက်ထဲမှာ အေလောက်ရာပါရေဟု တောင်းပန်ပြီးလိုက်ပါလာရသည်။
အကျွန်ုပ်ရို့ စီး၍လိုက်ပါလာသောကားမှာ ကုန်တင်ကားဖြစ်သည်။ ခေါင်မိုးမပါ။ ဆန်အိပ်များ၊ ဘောက်သာအိပ်များထက်က တက်စီး၍ လိုက်ပါလာရသည်။ ခေါင်မိုးထက်၌တက်စီးသူ စုစုပေါင်းဆယ်ယောက်လောက်ဟိမည်။ အကျွန်ုပ်နံပါးတွင် ချင်းလူငယ်တယောက်လည်းပါသည်။ စကားတခွန်းနှစ်ခွန်းပြောဖြစ်သည်။ များများစားစားမပြောဖြစ်။ မြန်မာပြည်မှလာသည်ကို လူများများသိ၍လည်းမကောင်း။ အတတ်နိုင်ဆုံးစကားတခွန်းမပြောဘဲ လိုက်ပါလာလတ်သည်။
ကျင်ဖိုင်းမြို့အထွက် ချောင်းကြီးတချောင်းဖြတ်ရသည်။ မြစ်နီးပါးကြီးသည်။ အထက်က ခေါင်မိုးမပါသဖြင့် ချောင်းသို့အဆင်းလမ်းတလျှောက် အောက်ကကားများကို အတိုင်းသားလှမ်းမြင်နီရသည်။ ချောင်းဆင်းလမ်းမှာ ၀က်အူရစ်ကိုထောင်ထားသည့်အတိုင်းဖြစ်သည်။ တောင်အောက်ဖက်သို့ ရောက်သည့်အခါတွင်လည်း အထက်က ကားများကို လှမ်းမြင်ရသည်။ ချောင်းသို့ရောက်၍ တောင်ထက်က ကားများကိုမြင်မှ တောင်ထိပ်မှာ ကောင်းခင်လောက်မြင့်ကြောင်း သဖောပေါက်သည်။
လက်ထဲဟိသမျှငွေကို ကားခပီးလိုက်ပြီးဖြစ်သဖြင့် ထမင်းတနပ်အငတ်ခံရန်ဆုံးဖြတ်လိုက်သည်။ ချင်းလူငယ်မှာ အကျွန်ုပ်ထမင်းမစားဘဲနီသည်ကိုသိသဖြင့် ထမင်းဝယ်ကျွေးပါသည်။ ယင်းအချိန်တွင် အကျွန်ုပ်မှာ လူအ၀တ်နှင့်ဖြစ်သည်။ သစ်ခွတ်သမားလူငယ်များက အကျွန်ုပ်အား ဘောင်းဖီတလုံး င်္အကျီတလုံးပီးနှင့်ထားခသည်။ လူကလည်းကတုံး ပိန်ချုံးပြီး အ၀တ်အစားမှာလည်း စုတ်ပြတ်သတ်နီသဖြင့် ဈီးရောင်းသော မီဇူမိမ္မချေများက အကျွန်ုပ်အားကြည့်ပြီး ကောင်းကောင်းရယ်ကတ်ပါသည်။ အကျွန်ုပ်လည်း ရှက်ရှက်ဖြင့် ပြုံးရယ်နီလိုက်သည်။
အကျွန်ုပ်သတင်းရသည်မှာ မြန်မာကျောင်းသားများ Top Hotel ၌ အလုပ်လုပ်နီကတ်သည်။ Aizawl ရောက်လျှင် Top Hotel သို့ စုံစမ်း၍လားမည်။ တည လမ်းဘေး၌အိပ်မည်။ ကိုယ့်အတွေးနှင့် ကိုယ့်အစီအစဉ်နှင့်ဖြစ်သည်။ အမှန်မှာ ကျောင်းသားများက Top Hotel ၌ အလုပ်လုပ်နီသည်မဟုတ်၊ Top Resturant နာမည်ဖြင့် Bara Bazar ၌ လဖက်ရည်ဆိုင်ဖွင့်ထားခြင်းဖြစ်သည်။ Aizawl သို့ရောက်ချိန်တွင် မှောင်နီပြီးဖြစ်သည်။ Aizawl မြို့ကား တောင်ထိပ်အစွန်ဖျားတွင် မီးထိန်ထိန်လင်းလျှက် သီတင်းကျွတ် ၀ါကျွတ်ပွဲကဲ့သို့ အလွန်လှပသည်။ တညက ဇာပင်ဖြစ်ဖြစ် လမ်းဘေးမှာ ထိုးအိပ်ဖို့ဆုံးဖြတ်ထားသည်။ အကျွန်ုပ်နှင့်အတူ ကားစီးလာသောချင်းလူငယ်မှာ ကုန်သည်ဖြစ်သဖြင့် အထုပ်အပိုးများစွာပါသည်။ အကျွန်ုပ်လည်း အထုပ်အပိုးများကို ကူသယ်ပီးသည်။ သူက အကျွန်ုပ်အား မည်သည့်နီရာတွင် တည်းမည်နည်းဟု မီးသည်။ အကျွန်ုပ်က ခပ်တည်တည်ဖြင့် Top Hotel ၌ တည်းမည်ဟု ပြန်ဖြေလိုက်သည်။ သို့သော် လူငယ်က သဘောကောင်းသူဖြစ်သဖြင့် မြန်မာစကားဖြင့် မထူးပါဘူးဗျာ၊ ညကလည်းမှောင်နေပြီ ကျွန်ုပ်အိမ်မှာဘဲ ညအိပ်လိုက်ပါ၊ အိမ်အောက်မှာ ရက္ကန်းခတ်တဲ့ဗမာလူတွေရှိတယ်။ သူတို့ ဗမာကျောင်းသားတွေနေတဲ့နေရာသိတယ်။ မနက်ကျရင် သူတို့ကို လိုက်ပို့ခိုင်းရင်ရတယ်ဟုပြောသဖြင့် အကျွန်ုပ်လည်း ၀မ်းသာအားရ သူ၏ဖိတ်ခေါ်ချက်ကို လက်ခံလိုက်သည်။ လမ်းဘေးမှာအိပ်ဖို့မလိုလိုက်ယာဟုသိလိုက်ပြီး ချင်းလူငယ်အား စိတ်ထဲတွင်ကြိတ်၍ ကျေးဇူးတင်နီမိသည်။ ညစာထမင်းလည်း ၀က်သားနှင့် ကောင်းကောင်းစားရသည်။ ကောင်းကောင်းမွန်မွန်အိပ်ရသည်။ နောက်နိမိုးလင်းလျှင် ရက္ကန်းခတ်နီသော မြန်မာလူငယ်များက ကျောင်းသားများဟိရာအိမ်သို့လိုက်ပို့ပီးသည်။ အိမ်မှာ Top Resturant တည်ဟိရာ Bara Bazar လမ်းမကြီးအောက် လှီကားထစ်ဘေးနားတွင်ဖြစ်သည်။ Top Resturant ကို ကိုမောင်ငါက ဦးစီးဖွင့်လှစ်ထားခြင်းဖြစ်ပြီး အိမ်ကိုလည်း သူကပင် ငှားရမ်းထားခြင်းဖြစ်သည်။ ကိုမောင်ငါနှင့်အတူ ကျောင်းသား လေးငါးယောက်နီသည်။ အကျွန်ုပ်မှတ်မိသလောက် မိုးချုပ် (ယခု) VOA သတင်းထောက်၊ သူက အသက်အငယ်ဆုံး၊ ကိုဇော်ဌေး (ယခု) သြစတေးလျ။ ကိုဆန်နီ၊ ကိုပေတိုး၊ ဘူးလာအမိ မခေါ်မီး၊ ကိုမောင်ငါ၊ ကိုမြင့်အေး (ယခု) နော်ဝေး၊ ကိုဝင်းထွန်း (ကျဆုံး)။ ကျန်လူများကိုကား အတိအကျမမှတ်မိ။ နောက်တနိတွင် အကျွန်ုပ်ပြန်ရောက်လာသည်ကို ကြားသိရဖြင့် အစ်မမစမ်းပွီး ၀မ်းသာအားရလာတွိပါသည်။ အစ်မမစမ်းပွီး၏ပြောပြချက်အရ ရဲစခန်းအား နယ်စပ်သို့မပို့ရန်တောင်းပန်ထားသည့်ကြားက ပို့ဖြစ်အောင်ပို့လိုက်သည်ဟု မကြေမနပ်ဖြင့် ပြန်ပြောပြပါသည်။ ရောက်စပေါက်စ အချုပ်ကထွက်ခါစ အပြင်လည်းကောင်းကောင်းမထွက်ဝန့်သဖြင့် ချင်းလူငယ်အိမ်သို့ အလည်မလားဖြစ်လိုက်ပါယာ။ စိတ်ထဲတွင်ကား အမြဲတမ်းသတိရနီပါသည်။ ကနိအချိန်၌ပြန်တွိလျှင်လည်း မှတ်မိမည်မဟုတ်တော့ပါ။ မိမိ၏ကျေးဇူးကန်းသောအဖြစ်ကို တွေးမိတိုင်း စိတ်မကောင်းဖြစ်မိ နောင်တရနီမိသည်။
ဇင်မဘောက်သို့ (ဆက်ရန်)

အာကုတ္တလာ (Agartala) သို့

အာကုတ္တလာ (Agartala) သို့
==================
Agartala တွင် မရမာဘုန်းကြီးကျောင်းတကျောင်းဟိသည်။ ဆရာတော်မှာ မြိုလူမျိုးဟုသိရသည်။ ရခိုင်ပြည် မြန်မာပြည်တွင် စာသင်ဖူးသဖြင့် ရခိုင်စကားကို ရခိုင်သားနှင့်မခြားပြောတတ်သည်။ မဏိပူရပြည်နယ် မိုးရေးတွင်လည်း ကျောင်းထိုင်ကြောင်းသိရသည်။ ဆရာတော်က အဖြစ်မှန်ကို မီးပါသည်။ အကျွန်ုပ်ရို့က ကြောက်၍ အဖြစ်မှန်ကိုမပြောဘဲ နှုတ်ပိတ်ထားလိုက်သည်။ အာကုတ္တလာမြို့သည် ထရိပူရ (မြုံ) လူမျိုးများ၏မြို့တော်ဆိုသော်လည်း မြုံလူမျိုးတဦးတယောက်မျှ မတွိရပါပျာယ်။ အားလုံး ကုလားများက ၀ါးမျိုထားပြီးဖြစ်သည်။ မြန်မာပြည် မော်လမြိုင်မြို့နှင့် အလားသဏ္ဍန်တူသည်။ မွန်ပြည်နယ်၏မြို့တော် မော်လမြိုင်တွင်လည်း မွန်လူမျိုးများမဟိတော့ဘဲ မူဆလင်ကုလားများက ကြီးစိုးထားသည်။ အကယ်၍ မြန်မာစစ်အစိုးရကလည်း ဦးနှောက်သေးသိမ်စွာဖြင့် ဒေသခံမွန်လူမျိုးများအား အာဏာလွှဲပြောင်းမပီးဘဲ ဆက်လက်ဖိနှိပ်နီဦးမည်ဆိုလျှင် မော်လမြိုင်မြို့သည်လည်း အများမကြာကျဆုံးရပေတော့မည်။ မော်လမြိုင်ကျဆုံးပြီးလျှင် ရန်ကုန်မြို့သည်ကား မည်မျှတာရှည်ရပ်တည်နိုင်မည်နည်း။ ရွှေတိဂုံဘုရားလည်း မျက်ခုံးမွှီးလှုပ်လျှက်ဟိသည်။
အာကုတ္တလာမှတဆင့် အကျွန်ုပ်ရို့ ထရိပူရရခိုင်လူမျိုးများဟိရာ မြို့ချေတမြို့သို့ ခရီးထွက်ခွာပါသည်။ ယင်းမြို့တွင် သက်လူမျိုးနှင့် ထရိပူရရခိုင်လူမျိုးအများအပြားတွိရသည်။ ဘုန်းကြီးကျောင်းမှာ အုပ်တိုက်အဆောက်အဦးဖြစ်ပြီး သာသာဝင်းဝင်းဟိသည်။ ၄င်းဘုန်းကြီးကျောင်းမှတဆင့် ရခိုင်ပြည်မှ ဘုန်းတော်ကြီးတပါးဖြစ်သော ဦးဝိရိယဟိရာ သက်ရွာသို့ခရီးဆက်ပါသည်။ သက်ရွာမှာ ဘင်္ဂလားဒေခ်ျမှထွက်ပြီးလာကတ်သော သက်လူမျိုးများအား ရွာထူထောင်ပီးထားခြင်းဖြစ်သည်။ ရွာဆိုသော်လည်း လူနီအိမ်များကို စီတန်းဆောက်ထားသည်မဟုတ် တောင်ကုန်းတောင်ကုန်းလိုက် ပြန့်ကြင်းတည်ထားခြင်းဖြစ်သည်။ တောင်ကုန်းတကုန်းနှင့်တကုန်းအကြား တအိမ်နှင့်တအိမ်ကြားတွင် လယ်ကွက်များဟိပြီး အလွန်သာယာသည်။
ဆရာတော်ဦးဝိရိယမှာ အသက် (၇၀) ခန့်ဟိပြီးဖြစ်သော်လည်း နာမည်နှင့်လိုက်အောင် သန်သန်မာမာ ဖြတ်ဖြတ်လတ်လတ်ဖြစ်သည်။ လားနိုင်လာနိုင်ဟိသည်။ ဆရာတော်ကား ရှိမှီနောက်မှီလည်းဖြစ်သည်။
ဗိုလ်ကြီးကြာလှအောင်ရို့တော်လှန်ရီးလုပ်စဉ်ကာလ ဘူးသီးတောင်ဖက်တွင်ဖြစ်သည်။ ဗိုလ်ကြီးကြာလှအောင်၏တပ်စိပ်တစိပ်က မြန်မာဖက်ခွက်စစ်တပ်အား အနိုင်ရလိုက်သည်။ ထိုသတင်းကို ကုလားများကြားသိသောအခါ ဂိုးချေရို့ရခိုင်နှင့်ငါရို့ကုလားဆိုစွာ ညီအစ်ကို မိတ်ဆွီတိရာမနား။ ရခိုင်တပ်အောင်ပွဲအတွက် ရခိုင်တပ်စိပ်အား ထမင်းခေါ်ဖိတ်ကျွေးပါသည်။ တပ်စိပ်တစိပ်လုံး တအိမ်ထဲတွင်စားဖို့နီရာမကန်။ တအိမ်တယောက်ကျစီခွဲ၍ ကျွေးပါသည်။ ငတုံးရခိုင်သားတိလည်း ကုလားကိုယုံပြီး ထမင်းဝမ်းတင်းအောင်စားသည်။ ကုလားများလည်း တအိမ်လူသုံးယောက် ကြိုးအဆင်သင့်ဖြင့် ထိုင်စောင့်နီသည်။ ရခိုင်သား ထမင်းစား၍၀မ်းတင်းသောအခါ ကုလားများက သီနပ်ကိုလု၍ လူကိုကြိုးချိုင်ထားလိုက်သည်။ တပ်စိပ်တစိပ်လုံးကို တယောက်ချင်းစီ ပက်ခုံးတွင်ဝါးထိုးကြိုးချိုင်လျှက် ကျားထိုးသတ်ပစ်လိုက်ကတ်သည်။ တပ်စိပ်ခေါင်းဆောင်ကပြောသည်မှာ ရခိုင်သားသတ္တိအကျမခံကဲ့။ ကုလားတိအနားကပ်လာကေ ဘောကိုကျောက်သတ်ဟုပြောသည်။ သို့သော် ကျောက်၍ကားမမှီ။ လီကိုရာထိသည်။ သို့ဖြင့် ဗိုလ်ကြီးကြာလှအောင်၏တပ်စိပ်တစိပ်လုံး ကုလားပါးမှာ ကျားထိုးအသတ်ခံလိုက်ရကြောင်း ဆရာတော်ဦးဝိရိယပြောပြ၍ သိခရပါသည်။ (ဆက်ရန်)
အကျွန်ုပ်ရို့ ၄င်းသက်ရွာ၌နီထိုင်စဉ် အခြားသက်ရွာတရွာ၌ ရဟန်းခံပွဲနှင့်ကြုံသည်။ ဆရာတော်က ရဟန်းခံချင်ရေလားဟုမီး၍ နှစ်ယောက်စလုံးမှာ မောင်သျှင်များဖြစ်နီသဖြင့် ရဟန်းဝင်ခံရန် သဖောတူလိုက်သည်။ ဘုန်းတော်ကြီးကျောင်းဝင်းအတွင်း သိမ်သမုဒ်ထားသောနီရာတွင် ကမ္မာဝါစာဖတ်၍ ရဟန်းခံပီးပါသည်။ အကျွန်ုပ်ရို့နှစ်ယောက် ရဟန်း (၁) ပါး စုစုပေါင်းသုံးပါးဖြစ်သည်။ အကျွန်ုပ်စိတ်ထဲမှာ ရာသက်ပန်ဘုန်းကြီးဝတ်ချင်စိတ်မဟိသည်ဖြစ်၍ ယင်းလောက်ထိ လေးလေးနက်နက်မဟိပါ။
အကျွန်ုပ်ရို့ရဟန်းခံပြီးသည်နှင့်အများမကြာ သက်တော်လှန်ရီးစစ်ဦးစီးချုပ် ကန္တကောက်ဆရာတော် အကျွန်ုပ်ရို့နီထိုင်ရာသက်ရွာသို့ ရောက်ဟိလာသည်။ ဆရာတော်ဆိုသော်လည်း လူဝတ်လှဲပြီးဖြစ်သည်။ သိက္ခာမချသိမ့်သဖြင့် ဘန္တေ (ဆရာတော်) ဟူ၍ လူအများက ခေါ်လျှက်ပင်ဟိသည်။ မယားပီးစပ်သော်လည်း မယားမယူဘဲနီသည်။ သီလမပျက်အောင် ညစာထမင်းလည်းမစား။ အလွန်ကြည်ညိုဖွယ်ကောင်းသော တော်လှန်ရီးခေါင်းဆောင်ကောင်းတယောက်ဖြစ်သည်။ ဆရာတော်မှာ ဟာရဘင်းရွာဇာတိဟု သိရသည်။ ရခိုင်လူမျိုးဖြစ်နီ၍ အကျွန်ုပ်ရို့အတွက် ဂုဏ်ယူစရာဖြစ်သည်။ ဘင်္ဂလားဒေခ်ျ၌ ချိတ်ခါဆီးနာ အာဏာရပြီးနောက် သက်တော်လှန်ရီးခေါင်းဆောင်များနှင့် ငြိမ်းချမ်းရီးစာချုပ်ချုပ်ပြီးနောက် ဆရာတော်လည်း သက်ခေါင်းဆောင်များနှင့်အတူ ပြည်ထဲသို့ပြန်ဝင်လားသည်။ အကျွန်ုပ်ရို့နှင့်တွိဆုံသည့်အချိန်၌ပင် ဆရာတော်မှာ အသက် (၆၅) နှစ် ကျော်လွန်နီပြီးဖြစ်၍ ယခုအချိန်၌ အသက်ရှင်လျှက်ဟိလိမ့်မည်မထင်တော့ပါ။ ဆရာတော်တွင် ဘော်ဒီကတ် (၁) ယောက်နှင့် သက်ခေါင်းဆောင် (၂) ယောက်ပါသည်။ စုစုပေါင်း (၄) ယောက်ဖြစ်သည်။ မီဇူရမ်နယ်စပ်ဖက်သို့ ခရီးလားခြင်းဖြစ်သည်။ အကျွန်ုပ်လည်း မီဇူရမ်သို့ ခရီးလားလိုသည်ဖြစ်၍ ဆရာတော်ရို့ဂျစ်ကားနှင့် လမ်းကြုံလိုက်ပါလတ်သည်။ လမ်းတွင်မိုးရွာထားသဖြင့် သစ်တပင်မှာ ပြိုလဲလျှက် ကားလမ်းမအား ကန့်လန့်ဖြတ်ထားသည်။ သစ်ပင်ကိုခွတ်ဖြတ်ပြီးမှ ခရီးဆက်၍ရသည်။ သစ်ပင်မှာ ခြိတ်ပင်ဖြစ်နီ၍ သွီးမတည့်လျှင် ခြိတ်ပေါက်တတ်သဖြင့် ဆရာတော်က အနားသို့မကပ်ရန် သတိပီးသည်။ ဆရာတော်ရို့ကား Aizawl ကိုမဖြတ်၊ နယ်စပ်လမ်းအတိုင်းလားမည်ဖြစ်သဖြင့် အကျွန်ုပ်အား မီဇူရမ်အ၀င် သက်ရွာတရွာတွင် ချထားပီးခသည်။ ၄င်းသက်ရွာမှ ကားစီးလျှင် Aizawl သို့ တိုက်ရိုက်ရောက်သည်။ (ဆက်ရန်)

အိန္ဒိယသို့.

အိန္ဒိယသို့.
=======
အကျွန်ုပ်နှင့်အတူ အိန္ဒိယသို့ခရီးလားသူမှာ ရမလပဗိုလ်မှုးဟောင်းတဦးဖြစ်သည်။ နာမည်းရင်းကိုကား အကျွန်ုပ်မသိ။ ဗိုလ်မှုးဟူ၍သာခေါ်သည်။ မောင်သျှင်ဝတ်လျှက်ဖြစ်သည်။ ဗိုလ်မှုးအားမောင်သျှင်ဝတ်ပီးသူမှာ ဖလောင်းချိတ်ကျောင်းကြီးကျောင်းဆရာတော်ကြီးကိုယ်တိုင်ဖြစ်သည်။ ဗိုလ်မှုးမှာ ၀၀တုတ်တုတ် မျက်နှာလေးပြားကျ လက်တွိသမား အလုပ်သမားဖြစ်သည်။ သို့သော် စကားပြောလျှင်ကား ဖြေးဖြေးညှင်းညှင်းပြောတတ်သည်။
ပထမဦးစွာစစ်တကောင်းမြို့သို့လား၍ စစ်တကောင်းမှတဆင့် ဖလံထောင် ရင်ကွာမြို့သို့ ထွက်ခွာသည်။ ရင်ကွာဘုန်းကြီးကျောင်း၌တည်းခိုသည်။ နှစ်ယောက်စလုံးမှာ မောင်သျှင်ဝတ်နှင့်ဖြစ်၍ လားရလာရ တည်းရခိုရလွယ်ကူသည်။ ရင်ကွာမှာ နယ်စပ်မြို့တမြို့ဖြစ်သည်။ တဖက်ကမ်းတွင် အိန္ဒိယနိုင်ငံ ထရိပူရပြည်နယ် ဘောင်းကူမြို့ဟိသည်။ အကျွန်ုပ်ရို့ရောက်လားချိန်သည် နွီခါသားဖြစ်သည်။ နယ်စပ်ချောင်းကား ယင်းလောက်ထိမကြီးပါ။ အေဖက်ကမ်းက လက်ခဲပစ်လျှင် ထိုဖက်ကမ်းသို့ရောက်သည်။ ဘုန်းကြီးကျောင်းမှာ ကားလမ်း၏တောင်ဖက်ခြမ်းတွင်တည်ဟိပြီး ချောင်းမှာ မြောက်ဖက်ခြမ်းတွင်တည်ဟိသည်။ ဘုန်းကြီးကျောင်းမှ လှမ်းကြည့်လျှင် နယ်စပ်ချောင်းကို လှမ်းမြင်ရသည်။ ဘုန်းကြီးကျောင်းမှာ ကားလမ်းမနှင့် ကပ်လျှက်တည်ဟိပြီး ကားလမ်းမကျော်လျှင် လယ်ကွင်းများဟိသည်။ ပြီးလျှင် နယ်စပ်ချောင်းဟိသည်။ အကျွန်ုပ်ရို့က ညတွင်ဘုန်းကြီးကျောင်းကတဆင့် ကားလမ်းမကိုကျော်၍ လယ်ကွင်းပြင်ကိုဖြတ်ပြီး နယ်စပ်ချောင်းကိုကူးဖြတ်ချင်သည်။ သို့သော် ဆရာတော်ကြီးနှင့် ရွာသားများက သဘောမတူ။ (၂၄) နာရီ ကင်းစောင့်ချထားသောကြောင့်ဖြစ်သည်။ အကယ်၍ မိလားပါက ဆရာတော်ကြီးအပါအ၀င် ရွာသားများအားလုံး ဒုက္ခရောက်မည်။ (ဆက်ရန်)
စကားစပ်၍ပြောရလျှင် ရင်ကွာတွင် မရမာအိမ်ခြီအင်တန်များများဟိသည်။ နယ်စပ်ချောင်းနားတလျှောက် ရပ်ကွက်ကြီးများဟိသည်။ အကျွန်ုပ်ရို့မရောက်ခင် ငါးနှစ်အယင်လောက်က မြီပြန့်မှ အခြီချရန်ရောက်ဟိလာသော ကုလားများက ဒေသခံမရမာများအား လူမျိုးရေးအဓိကရုဏ်းဖန်တီးပြီး မောင်းထုတ်လိုက်ကတ်သည်ဟုဆိုသည်။ ပြီးလျှင် မရမာလူမျိုးများပိုင်ဆိုင်သော လယ်မြီများကို အပိုင်သိမ်းယူထားလိုက်သည်။ အိန္ဒိယသို့ထွက်ပြီးလာသော မရမာလူမျိုး (၃၀၀၀) ကျော်အား အိန္ဒိယအစိုးရမှ ဘောင်းကူမြို့တွင် ဒုက္ခသည်စခန်းတည်ဆောက်၍ ကြည့်ရှုစောင့်မထားသည်။ အခြားတဖက်တွင် ပညာတတ်မရမာအမျိုးသမီးများအား သိမ်းပိုက်ထားပြီး မူဆလင်ဇတ်သွင်းထားသည် သာဓကမြောက်များစွာဟိသည်ဟုဆိုသည်။ ထိုသို့ပြုလုပ်ရန် ကုလားဗလီများက ငွေကြီးထောက်ပံကူညီသည်ဟုဆိုသည်။ တနည်းပြောရလျှင် လူမျိုးရေးဝါးမျိုခြင်း (သို့မဟုတ်) တည့်တည့်ပြောရလျှင် (လိင်) နှင့် သာသနာပြုခြင်းဖြစ်သည်။
အကျွန်ုပ်ရို့လည်း ရောက်တုန်းရောက်ခိုက် နယ်စပ်ဖြတ်ကျော်ရန် အခြီနီကို လေ့လာစောင့်ဆိုင်းယင်း ဗဟုသုတအဖြစ် ဖလံထောင်၏မြို့တော်ဖြစ်သော ခါကစရီမြို့သို့ အလည်တခေါက်လားဖြစ်လိုက်ပါသည်။ ခါကစရီတွင် မရမာအိမ်ခြီများများ ရပ်ကွက်များများဟိပါသိမ့်သည်။ သို့သော် မြို့၏သုံးပုံ နှစ်ပုံကိုကား ကုလားများသိမ်းပိုက်ထားပြီးဖြစ်သည်။ အကျွန်ုပ်ရို့တည်းခိုသော ဘုန်းကြီးကျောင်းထိုင်ဆရာတော်မှာ ရဟန်းပျိုတပါးဖြစ်ပြီး ရခိုင်ပြည် မြန်မာပြည်တွင် စာသင်ဖူးကာ အတွေးအခေါ်အမြော်အမြင်ဟိသော ပညာတတ်ရဟန်းတပါးလည်းဖြစ်သည်။ ဖလံသားစကားမှာ ရမ်းဗြဲလီသံပါသည်။ ဗိုလ်မင်းထောင်နှင့် ဖလံထောင်အကြားတွင် သက်ထောင်တခုလုံးကြားခံထားသဖြင့် ဖလံထောင်သည် ဗိုလ်မင်းထောင်နှင့်နှိုင်းစာလျှင် မြီပြန့်ဒေသ ရခိုင်သားများနှင့်ဆက်စပ်မှုပိုနည်းသည်။
ရင်ကွာ၌ အကျွန်ုပ်ရို့တည်းခိုသောကျောင်းတွင် မောင်သျှင်ချေတပါးဟိသည်။ သူက ဘောင်းကူးဒုက္ခသည်စခန်းသို့လားနီကျဖြစ်၍ ကူးဖြတ်ရသည့်နီရာနှင့်အချိန်ကို ကောင်းစွာသိသည်။ ကူးဖြတ်ရသည့်နီရမှာ မြို့၏အရှိမြောက်ဖက် ဒုက္ခသည်စခန်း၏တဖက်ကမ်းဖြစ်သည်။ ဘုန်းကြီးကျောင်းမှ နှစ်မိုင်လောက်ဝီးသည်။ ထိုနီရာသို့မရောက်ခင် ဘင်္ဂလားနယ်ခြားစောင့် BDR စခန်းတခုကိုလည်းဖြတ်ရသည်။ BDR စခန်းအလွန် မရမာရွာတရွာဟိသည်။ အကျွန်ုပ်ရို့အားမီးလျှင် ၄င်းမရမာရွာသို့ ပရိတ်ဟောလားသည်ဟု အကြောင်းပြဖြေသည်။ ၄င်း BDR စခန်းကိုကျော်လွန်ပြီး တောလမ်းဖက်ရောက်သောအခါ ကင်း Post တခုဟိသည်။ ကင်းစောင့်စစ်သား၏ထမင်းစားချိန်ကို အလိုက်ချောင်းရသည်။ ပထမတခေါက် အဆင်မပြေ။ တရက်နှစ်ရက်နားပြီး ဒုတိယတခေါက်ကြိုးစားသည်။ အဆင်မပြေ။ တတိယအခေါက်တွင် အဆင်ပြေသည်။ ကင်းစောင့်စစ်သားမဟိခိုက် ချောင်းကိုပြီးဆင်းရသည်။ နွီခါသားဖြင်သဖြင့် ချောင်းရီမှာ ခါးလောက်ရာနက်သည်။ ရီချိုချောင်းဖြစ်သည်။ ထိုဖက်ကမ်းကူးသည်နှင့် ဒုက္ခသည်စခန်းသို့တန်းရောက်သည်။ ဒုက္ခသည်စခန်းတွင် ဘုန်းကြီးကျောင်းတခုဟိသည်။ ကျောင်းဆိုသော်လည်း သီးသန့်ကျောင်းမဟုတ်၊ ဒုက္ခသည်လိုင်းတန်းနှင့်တွဲလျှက် ဘုန်းကြီးကျောင်းခန်းဖွင့်ထားခြင်းဖြစ်သည်။ သက်ကယ်မိုး ၀ါးခင်းအခန်းသာလျှင်ဖြစ်သည်။
ဒုက္ခသည်စခန်းမှ ဒုက္ခသည်များအား ကြည့်မြင်ရသည်မှာ ကောင်းကောင်းစိတ်ပျက်ဖို့ကောင်းသည်။ အိန္ဒိယအစိုးရကထောက်ပံ့သော မ၀ရေစာဖြင့် ဒုက္ခသည်များမှာ အဟာရချို့တဲ့ ကျမ္မာရီးချို့တဲ့လျှက် အရိုးပေါ်အရီကပ်လျှက်ဟိသည်။ အကျွန်ုပ်ရ်ို့အား လမ်းပြလိုက်ပို့သောမောင်သျှင်ချေက င်္သချိုင်းကုန်းကို လိုက်ပြပါသည်။ တောင်သုံးလုံးအပြည့်၊ မြှုပ်ဖို့နီရာတောင် မကျန်လိုက်ပျာယ်။ ဤပြဿနာအား ကမ္ဘာကလည်း မသိ။ တယောက်ချေလည်း မသိ။ မီးခဲပြာဖုံးဘ၀ဖြင့် အတိဒုက္ခရောက်လျှက်ဟိသည်။ ဘင်္ဂလားဒေခ်ျတွင် ချိတ်ခါဆီးနာ အာဏာရလာသောအခါ မရမာဒုက္ခသည်များပြန်လက်ခံသည်။ သို့သော် သူရို့ပိုင်လယ်မြီများကိုကားပြန်မရ။ ဒုက္ခသည်စခန်းတွင် တရက်နှစ်ရက်နီပြီး ထရိပူရပြည်နယ်မြို့တော် Agatala သို့ ခရီးဆက်ပါသည်။ (ဆက်ရန်)

စကားစပ်၍ပြောရလျှင် ရင်ကွာတွင် မရမာအိမ်ခြီအင်တန်များများဟိသည်။ နယ်စပ်ချောင်းနားတလျှောက် ရပ်ကွက်ကြီးများဟိသည်။ အကျွန်ုပ်ရို့မရောက်ခင်
ငါးနှစ်အယင်လောက်က မြီပြန့်မှ အခြီချရန်ရောက်ဟိလာသော ကုလားများက ဒေသခံမရမာများအား လူမျိုးရေးအဓိကရုဏ်းဖန်တီးပြီး
မောင်းထုတ်လိုက်ကတ်သည်ဟုဆိုသည်။ ပြီးလျှင် မရမာလူမျိုးများပိုင်ဆိုင်သော လယ်မြီများကို အပိုင်သိမ်းယူထားလိုက်သည်။ အိန္ဒိယသို့ထွက်ပြီးလာသော
မရမာလူမျိုး (၃၀၀၀) ကျော်အား အိန္ဒိယအစိုးရမှ ဘောင်းကူမြို့တွင် ဒုက္ခသည်စခန်းတည်ဆောက်၍ ကြည့်ရှုစောင့်မထားသည်။ အခြားတဖက်တွင်
ပညာတတ်မရမာအမျိုးသမီးများအား သိမ်းပိုက်ထားပြီး မူဆလင်ဇတ်သွင်းထားသည် သာဓကမြောက်များစွာဟိသည်ဟုဆိုသည်။ ထိုသို့ပြုလုပ်ရန် ကုလားဗလီများက
ငွေကြီးထောက်ပံကူညီသည်ဟုဆိုသည်။ တနည်းပြောရလျှင် လူမျိုးရေးဝါးမျိုခြင်း (သို့မဟုတ်) တည့်တည့်ပြောရလျှင် (လိင်) နှင့် သာသနာပြုခြင်းဖြစ်သည်။
အကျွန်ုပ်ရို့လည်း ရောက်တုန်းရောက်ခိုက် နယ်စပ်ဖြတ်ကျော်ရန် အခြီနီကို လေ့လာစောင့်ဆိုင်းယင်း ဗဟုသုတအဖြစ် ဖလံထောင်၏မြို့တော်ဖြစ်သော
ခါကစရီမြို့သို့ အလည်တခေါက်လားဖြစ်လိုက်ပါသည်။ ခါကစရီတွင် မရမာအိမ်ခြီများများ ရပ်ကွက်များများဟိပါသိမ့်သည်။ သို့သော် မြို့၏သုံးပုံ နှစ်ပုံကိုကား
ကုလားများသိမ်းပိုက်ထားပြီးဖြစ်သည်။ အကျွန်ုပ်ရို့တည်းခိုသော ဘုန်းကြီးကျောင်းထိုင်ဆရာတော်မှာ ရဟန်းပျိုတပါးဖြစ်ပြီး ရခိုင်ပြည် မြန်မာပြည်တွင် စာသင်ဖူးကာ
အတွေးအခေါ်အမြော်အမြင်ဟိသော ပညာတတ်ရဟန်းတပါးလည်းဖြစ်သည်။ ဖလံသားစကားမှာ ရမ်းဗြဲလီသံပါသည်။ ဗိုလ်မင်းထောင်နှင့် ဖလံထောင်အကြားတွင်
သက်ထောင်တခုလုံးကြားခံထားသဖြင့် ဖလံထောင်သည် ဗိုလ်မင်းထောင်နှင့်နှိုင်းစာလျှင် မြီပြန့်ဒေသ ရခိုင်သားများနှင့်ဆက်စပ်မှုပိုနည်းသည်။
ရင်ကွာ၌ အကျွန်ုပ်ရို့တည်းခိုသောကျောင်းတွင် မောင်သျှင်ချေတပါးဟိသည်။ သူက ဘောင်းကူးဒုက္ခသည်စခန်းသို့လားနီကျဖြစ်၍ ကူးဖြတ်ရသည့်နီရာနှင့်အချိန်ကို
ကောင်းစွာသိသည်။ ကူးဖြတ်ရသည့်နီရမှာ မြို့၏အရှိမြောက်ဖက် ဒုက္ခသည်စခန်း၏တဖက်ကမ်းဖြစ်သည်။ ဘုန်းကြီးကျောင်းမှ နှစ်မိုင်လောက်ဝီးသည်။
ထိုနီရာသို့မရောက်ခင် ဘင်္ဂလားနယ်ခြားစောင့် BDR စခန်းတခုကိုလည်းဖြတ်ရသည်။ BDR စခန်းအလွန် မရမာရွာတရွာဟိသည်။ အကျွန်ုပ်ရို့အားမီးလျှင်
၎င်းမရမာရွာသို့ ပရိတ်ဟောလားသည်ဟု အကြောင်းပြဖြေသည်။ ၄င်း BDR စခန်းကိုကျော်လွန်ပြီး တောလမ်းဖက်ရောက်သောအခါ ကင်း Post တခုဟိသည်။
ကင်းစောင့်စစ်သား၏ထမင်းစားချိန်ကို အလိုက်ချောင်းရသည်။ ပထမတခေါက် အဆင်မပြေ။ တရက်နှစ်ရက်နားပြီး ဒုတိယတခေါက်ကြိုးစားသည်။ အဆင်မပြေ။
တတိယအခေါက်တွင် အဆင်ပြေသည်။ ကင်းစောင့်စစ်သားမဟိခိုက် ချောင်းကိုပြီးဆင်းရသည်။ နွီခါသားဖြင်သဖြင့် ချောင်းရီမှာ ခါးလောက်ရာနက်သည်။
ရီချိုချောင်းဖြစ်သည်။ ထိုဖက်ကမ်းကူးသည်နှင့် ဒုက္ခသည်စခန်းသို့တန်းရောက်သည်။ ဒုက္ခသည်စခန်းတွင် ဘုန်းကြီးကျောင်းတခုဟိသည်။ ကျောင်းဆိုသော်လည်း
သီးသန့်ကျောင်းမဟုတ်၊ ဒုက္ခသည်လိုင်းတန်းနှင့်တွဲလျှက် ဘုန်းကြီးကျောင်းခန်းဖွင့်ထားခြင်းဖြစ်သည်။ သက်ကယ်မိုး ၀ါးခင်းအခန်းသာလျှင်ဖြစ်သည်။
ဒုက္ခသည်စခန်းမှ ဒုက္ခသည်များအား ကြည့်မြင်ရသည်မှာ ကောင်းကောင်းစိတ်ပျက်ဖို့ကောင်းသည်။ အိန္ဒိယအစိုးရကထောက်ပံ့သော မ၀ရေစာဖြင့် ဒုက္ခသည်များမှာ
အဟာရချို့တဲ့ ကျမ္မာရီးချို့တဲ့လျှက် အရိုးပေါ်အရီကပ်လျှက်ဟိသည်။ အကျွန်ုပ်ရ်ို့အား လမ်းပြလိုက်ပို့သောမောင်သျှင်ချေက င်္သချိုင်းကုန်းကို လိုက်ပြပါသည်။
တောင်သုံးလုံးအပြည့်၊ မြှုပ်ဖို့နီရာတောင် မကျန်လိုက်ပျာယ်။ ဤပြဿနာအား ကမ္ဘာကလည်း မသိ။ တယောက်ချေလည်း မသိ။ မီးခဲပြာဖုံးဘ၀ဖြင့်
အတိဒုက္ခရောက်လျှက်ဟိသည်။ ဘင်္ဂလားဒေခ်ျတွင် ချိတ်ခါဆီးနာ အာဏာရလာသောအခါ မရမာဒုက္ခသည်များပြန်လက်ခံသည်။ သို့သော်
သူရို့ပိုင်လယ်မြီများကိုကားပြန်မရ။ ဒုက္ခသည်စခန်းတွင် တရက်နှစ်ရက်နီပြီး ထရိပူရပြည်နယ်မြို့တော် Agatala သို့ ခရီးဆက်ပါသည်။ (ဆက်ရန်)

မြိုတောင်ခရီး

မြိုတောင်ခရီး
=======

အိန္ဒိယဖက်သို့ကူးရန်ကိစ္စသည် လွယ်ကူသောကိစ္စမဟုတ်။ ဘာသာစကားလည်း အခက်အခဲဟိသည်။ ငွေကြီးအားဖြင့်လည်း အခက်အခဲဟိသည်။ နယ်စပ်ကိုလည်းဖြတ်ကျော်ရဦးမည်။ လူအ၀တ်နှင့်ကူးလျှင် လားရလာရ တည်းခိုရ အခက်အခဲပေါင်းများစွာဟိသည်။ ထို့ကြောင့် မောင်သျှင်ဝတ်ဖြင့်ကူးရန် ဆုံးဖြတ်လိုက်သည်။ အကျွန်ုပ်အား မောင်သျှင်ဝတ်ပီးသူမှာ မာလဖုံဆရာတော်သီလ၀ံသဖြစ်သည်။ မာလဖုံဆရာတော်မှာ ရခိုင်ပြည်မှ ကိုယ်တော်ချေတပါးဖြစ်ပြီး ကောင်းကောင်းမျိုးချစ်စိတ်ပြင်းပြသော ဆရာတော်တပါးလည်းဖြစ်သည်။ အိန္ဒိယသို့မကူးခင် မြိုတောင်သို့တခေါက်ရောက်ဖူးချင်သည့်ဆန္ဒဟိသဖြင့် မြိုတောင်သို့တခေါက် ခရီးလားဖြစ်လိုက်ပါသည်။ ၁၉၈၉ ခု နွီခါသားဖြစ်သည်။ အကျွန်ုပ်နှင့်အတူ ကောက်ကဒွန်းသားတယောက် ကျောက်တန်းလမားဖက်က ရခိုင်သားတယောက် စုစုပေါင်းသုံးယောက်ဖြစ်သည်။ ကျောက်တန်းလမားဖက်ကလူမှာ မြိုစကားအနည်းငယ်တတ်သဖြင့် စကားပြန်အဖြစ်လိုက်ပို့ကူညီခြင်းဖြစ်သည်။ ကောက်ကဒွန်းသားလူုမှာ သူလည်းလားရောက်ဖူးချင်သဖြင့် အဖော်ခေါ်ယူလားဖြင်းဖြစ်သည်။ ကောက်ကဒွန်းသားဆိုသဖြင့် လူမျိုးခြားမဟုတ်။ ကောက်ကဒွန်းထောင်သားကို ဆိုလိုခြင်းဖြစ်သည်။ ကောက်ကဒွန်းသားစကားပြောလျှင် လီသံအနည်းငယ်ကွဲသည်ဟုဆိုသည်။ ရခိုင်ဘုရင်မင်းများလက်ထက်က တည်ထောင်ခသော ထောင်များထဲတွင် ကောက်ကဒွန်းထောင်လည်း အပါအ၀င်ဖြစ်သည်။ ကောက်ကဒွန်းထောင်ကား ဗိုလ်မင်းထောင်အပိုင်လား၊ ဖလံထောင်ထဲမှာလား အကျွန်ုပ်အတိအကျမသိ။ ဇလံထောင်ဖက်အပိုင်းဖြစ်မည်ဟု ခန့်မှန်းရသည်။

အကျွန်ုပ်ရို့ မြိုတောင်ခရီးစတင်ထွက်ခွာသည့်ရွာအား အတိအကျမမှတ်မိပါ။ တချောင်းတည်းကို အကြိမ် (၄၄) ကြိမ်ဖြတ်ကျော်ပြီး ညဇာသား မှောင်ခါနီးတွင် လောင်ချာကိုင်း နားပေါက်ကျယ်သက်ရွာသို့ရောက်သည်ကို စမှတ်မိသည်။ ထိုရွာတွင် ရခိုင်သားတယောက်ကို တွိရသည်။ ခြီထောက်တွင် သက်တန့်လိုက်၍ ဖူးရောင်လျှက်ဟိသည်။ အနာမှာ သက်သာလားပြီးဖြစ်သော်လည်း ကောင်းကောင်းလမ်းလျှောက်၍ မရသိမ့် ဒုတ်ထောက်လျှက် လျှောက်နီရသည်။ သက်ရွာသူကြီးက သနားသဖြင့် ပြုစုစောင့်မထားသည်။ အနာမကျက်တကျက်ဖြင့် နွားကျောင်းဆိတ်ကျောင်းအကူလုပ်ပီးသည်။ ၄င်းနားပေါက်ကျယ်သက်ရွာတွင် အကျွန်ုပ်ရို့ တညအိပ်သည်။ နောက်နိတွင် ၄င်းလောင်ချာကိုင်းသက်ရွာနှင့် ကောင်းကောင်းမ၀ီးသော ပထမဆုံးမြိုရွာသို့ ခရီးစတင်သည်။ ၄င်းမြိုရွာသည် မြီပြန့်မြိုရွာဖြစ်သည်။ သက်ရခိုင်ရွာများနှင့်နီးစပ်သဖြင့် ရွာသားများအားလုံး အ၀တ်အစားဝတ်သည်။ သို့သော် ထူးခြားသည်မှာ အကျွန်ုပ်ရို့ရွာသို့ရောက်ပြီးအများမကြာ အသက် (၁၉) နှစ်ခန့် လူရွယ်တဦးအကျွန်ုပ်ရို့အား လာတွိသည်။ အ၀တ်အစားမပါ လင်းကဲတုံးလုံးဖြစ်သည်။ ပဇာကြောင့် အ၀တ်မ၀တ်လဲဟုမီးသော် အ၀တ်ဝတ်လျှင်ယားသဖြင့် မ၀တ်ခြင်းဖြစ်သည်ဟုဆိုသည်။ မှတ်မှတ်ရရပြောပြသည်မှာ ဆရာမမြရာဇာလင်းရို့ လောင်ချာကိုင်းစခန်းတွင်နီထိုင်စဉ်ကာလ ဤရွာသို့လည်ပတ်စဉ် ဤလူရွယ်ကပင် လားတွိသည်ဟုဆိုသည်။ ရွာသူကြီးအိမ်ထက် ပါတီလူကြီးများရှိတွင် လူရွယ်က လင်းကဲတုံးလုံးပေါက်ချလာသဖြင့် ဆရာမမြရာဇာလင်းက အရှက်မွှမ်ပြီး ဆရာ အကျွန်မျက်နှာ ဇာနားမှာ ထားရဖို့လဲမသိယာဟုဆိုကြောင်း ပြောပြ၍သိရသည်။

၎င်းရွာတွင် မိုးထထမင်းစားသည်။ ပြီးနောက် နောက်တရွာသို့ ခရီးထွက်ခွာသည်။ ယင်းလင်းကဲတုံးလုံးလူရွယ်ကပင်လျှင် လမ်းပြလိုက်ပီးပါသည်။ ဒုတိယရွာမှာ တောင်ပေါ်ရွာဖြစ်သည်။ နာရီဝက် တနာရီခန့်တောင်တက်ပြီးနောက် ဒုတိယမြောက်ရွာသို့ရောက်သည်။ ရွာထိပ်တွက် မြိုမချေသုံးယောက်ဆန်ဖွတ်နီသည်။ လင်းကဲတုံးလုံးလူရွယ်ကိုမြင်သဖြင့် ပါးစကိုလက်ဝါးအုပ်၍ ရှက်ရှက်ဖြင့် ကြိတ်ရယ်ကတ်ပါသည်။ လူရွယ်ကား ရိုးနီပြီးဖြစ်သဖြင့် မျက်နှာအမူရာပျက်သည်ကိုပင် မတွိရ။ ၄င်းရွာမှ ဆက်လားရာ ညဇာသားတတိယမြောက် မြိုရွာသို့ရောက်သည်။ ၄င်းရွာတွင် ဘင်္ဂလီကုလားလူမျိုးတယောက် ၀ါးခွတ်လျှက်တွိရသည်။ တယောက်တည်းကား လားရဲမည်မဟုတ် တခြားအဖော်အပေါင်းလည်းပါမည်ဟု ခန့်မှန်းရသည်။ ရွာသူကြီးအိမ်တွင်တညအိပ်သည်။ နွီခါသားဖြစ်သော်လည်း ညဇာသားတွင်ချမ်းသဖြင့် မီးလှုံရသည်။ ရွာသူကြီး၏သမီးမှာ အသက် (၁၉) နှစ်ခန့်အရွယ် အသားညိုညို ၀၀တုတ်တုတ် သန်သန်မာမာဖြစ်သည်။ အပေါ်ပိုင်းင်္အကျီမ၀တ်၊ သဘာဝအတိုင်းဖြစ်သည်။ အိမ်ထောင်ကျပြီးဖြစ်မည်ဟု ခန့်မှန်းရသည်။ ရင်လုံးထွားထွားကြီး လှတုံးပတုံးဖြစ်သည်။ သို့သော် လင်ယောက်ျားကိုကားမမြင်။ အပျိုမလည်း ဖြစ်ကောင်းဖြစ်နိုင်သည်။

ထိုရွာတွင် တညအိမ်ပြီး နောက်နိမိုးလင်း တခြားတရွာသို့ ခရီးဆက်သည်။ ၄င်းရွာမှာ တောင်အလွန်မြင့်သည်။ နီပူတောက်တောက် တမွန်းတည့်တောင်တက်ရသည်။ ချွေးတဖြောက်ဖြောက်ကျသည်။ နိခြင်းနှစ်ချက်တီးကျော်လောက်မှာ ရွာသို့ရောက်သည်။ လမ်းခရီးတွင် နားတွင်ကြက်မောက်ပန်းအနီပန်လျှက် ယောင်ထုံးလျှက် မြိုလူပျိုများကိုလည်း တွိရသည်။ မြိုတောင်ခရီးလမ်းတလျှောက်တွင် ကြားစီကြားစပ် မြုံရွာများလည်းဟိသည်။ မြုံမများမှာ မြိုလူမျိုးများနှင့်မတူ ထပိန်ရှည်ရှည်ဒူးဆစ်လောက်ဝတ်သည်။ အပေါ်ပိုင်းင်္အကျီလည်းဝတ်သည်။ မြိုမများမှာ အပေါ်ပိုင်းင်္အကျီမ၀တ်။ ထပိန်လည်း တထွာလောက် ပေါင်ရင်းအထိရာ ၀တ်သည်။ မြုံလူမျိုးများမှာ ခရစ်ယာန်ဘာသာကိုးကွယ်သည်ဟုဆိုသည်။ အကျွန်ုပ်ရို့ကား မြုံရွာများ၌မတည်း မြိုရွာများ၌သာ တည်းခိုသည်။ ဆက်ပြောရလျှင် ၄င်းတောင်ပေါ်မြိုရွာသို့ နိခြင်း (၂) ချက်တီးလောက်တွင်ရောက်သည်။ အိမ်တအိမ်တွင် ခေတ္တနားပြီး နိခြင်းထမင်းချက်စားသည်။ အာဂန္ဓုများရောက်သဖြင့် အိမ်သားက အထူးကြပ်တိုက်တားသော ၀က်သားဟင်းဖြင့် အကျွန်ုပ်ရို့အားချက်ကျွေးသည်။ နွီခါသား တောင်ယာရိပ်သိမ်းပြီးခါစဖြစ်သဖြင့် အစားရိက္ခာပေါသည်။ တောင်ယာထမင်းကား ကောက်ညှင်းပေါင်းစားရသကဲ့သို့ အသားလွတ် လက်ခကျည်းစားသော်လည်း ကောင်းကောင်းစား၍ကောင်းပါသည်။ ၄င်းရွာတွင် နိခြင်းထမင်းစားပြီးနောက် နောက်တရွာမှာ တောင်အောက်ရွာဖြစ်သဖြင့် တောင်ဆင်းရပါသည်။ ညဇာသား မိုးမချုပ်ခင်ရွာသို့ရောက်သည်။ ရွာသည် တောင်ကျိုင်ကြားတွင်ဟိသည်။ နီကောင်းကောင်းမထိုး။ ခြီမျက်စိသာသာ မြောင်ချောင်းကိုဖြတ်ပြီး ရွာသို့ရောက်သည်။ ထိုရွာတွင် ညအိပ်ညစာစားသည်။ တရီးအိပ်၍ တရီးနိုးသောအခါ အကျွန်ုပ်၏၀မ်း ဖူးရောင်လာသည်။ ၀မ်းကြင့်ပြီး ၀မ်းဒရဟောလားသည်။ တောင်မြင့်ရွာ၌် နီပူတောက်တောက် နိခြင်းထမင်းကို ၀က်သားကြပ်တိုက်နှင့် စားခရသောကြောင့်ဖြစ်သည်။

အစပိုင်းတွင် တောလားထိုင်ပါသည်။ နောက်ပိုင် မနိုင်၍ အိမ်သားများကိုပြောပြီး အိမ်တန်းပျင်းက ယိုချရသည်။ ၀မ်းလားသည်မှာ သံစည်ပုံးဖြင့် ရီကိုသွန်ချသည့်အလား တဟူးဟူးဆင်းသည်။ ဤပြဿနာကို အကျွန်ုပ်ရို့ တင်ကြို၍ မစဉ်းစားမိခ။ ယူလာခသည့်ဆီးဝါးများမှာလည်း ပါရာစီတာမော့ ဆီးပြားများရာဖြစ်သည်။ အကျွန်ုပ်စိတ်ထဲတွင် လားယာဟု အဆုံးချလိုက်မ်ိသည်။

ကံကောင်းသည်မှာ အကျွန်ုပ်နှင့်အတူပါလာသော ကောက်ကဒွန်းသားမှာ ဆီးအကြောင်းအနည်းငယ်နားလည်သည်။ သစ်ကြုံးပင်၏အခေါက်ကို အရည်ကြိုသောက်လျှင်ကောင်းသည်ဆို၍ သစ်ကြုံးပင်အခေါက်ကိုလှီး၍ အရည်ကြိုသောက်ရာ အခွက်တည်းနှင့်ချက်ချင်းပျောက်သည်။ သစ်ခေါက်ကိုကြိုလိုက်သည်နှင့် အရောင်မှာ အဖန်ရည်ကျက်ကျက်ကဲ့သို့ အနီနက်နက်အရောင်ထွက်သည်။ သစ်ကြုံးပင်မှာ သစ်ပင်ကြီးမျိုးဖြစ်၍ အရွက်မှာ ဧကရာဇ်ပင် တမာပင်များကဲ့သို့ အရွက်ချွန်းချွန်းဖြစ်သည်။ မြိုစကားဖြင့် ဖာပိုင်ခေါ်ရေလဲမီးကြည့်သောအခါ မောင်ပြန်ပင်ဟုခေါ်ကြောင်းပြောသည်။ အကျွန်ုပ်၏အသက်ကို ကယ်သောအပင်ဖြစ်၍ “သစ်ကြုံး” “မောင်ပြန်” နာမည်ကို အခုထက်ထိ မှတ်မိနီပါသိမ့်သည်။ တောထဲ၌ တော်လှန်ရီးလုပ်နီသော တော်လှန်ရီးရဲဖော်များလည်း ဤသို့ မမျှော်လင့်ဘဲ အခက်ကြုံနိုင်သဖြင့် ဤအပိုဒ် မမိကျန်ရအောင် တကူးတကအတွက်ဖော်၍ ဖော်ပြလိုက်ရခြင်းဖြစ်သည်။

မြိုတောင်ခရီးတွင် ရွာပေါင်းနှစ်ဆယ်ခန့် ခရီးလားခပါသည်။ ရွာစဉ်များကိုကား အစဉ်သင့် မမှတ်မိလိုက်ပါယာ။ ထူးခြားသည့် မှတ်မိသည့် ရွာစဉ်များကို ချရွီးပါမည်။ မစီစဉ်မကျနိုင်ပါ။ တခြားတရွာတွင်ဖြစ်သည်။ မိသားတစု ရွာနှင့်အ၀ီး သီးသန့်နီပါသည်။ တောင်ယာခင်းလည်းဖြစ်နိုင်သည်။ အမိသည်မှာ တနှစ်သားအချေကိုပိုးလျှက် နီမကောင်းဖျားသည်ဟုပြော၍ ဆီးပါရေလား တောင်းပါသည်။ ငှက်ဖျားဖြစ်မည်ဟုခန့်မှန်းရသည်။ သို့သော် အကျွန်ုပ်ရို့လက်ထဲ၌ ငှက်ဖျားဆီးပါမလာ။ ပါလာသော ပါရာစီတာမော့ သုံးလေးပြားခန့်ကို ချပီးလိုက်သည်။ နောက်နိမိုးလင်း အဖျားသက်သာယင့်လားမီးသောအခါ သက်သာရေဟုပြောသည်။ အဖိုးသည်မှာ ဗုဒ္ဓဘာသာမြိုလူကြီးဖြစ်သည်။ အကျွန်ုပ်ကား ဘုန်းကြီးဝတ်နှင့်ဖြစ်၍ အကျွန်ုပ်အား မြီးချေနာမည်ပီးပါဆို၍ “အောင်သာဖြူ” ဟု ရခိုင်နာမည်ပီးလိုက်သည်။

စကားဆက်၍ပြောရလျှင် ထိုစဉ်က မြိုရွာများမှာ နှစ်ခြမ်းကွဲလျှက်ဟိသည်။ တခြမ်းက ဗုဒ္ဓဘာသာ မိရိုးဖလာနတ်ကိုးကွယ်သူများဖြစ်ပြီး နောက်တခြမ်းမှာ (မေလေး မေလုံး) ဂိုဏ်းဖြစ်သည်။ (မေလေး မေလုံး) ဂိုဏ်းမှာ အသစ်ပေါ်သော ဂိုဏ်းဖြစ်သည်။ ဗုဒ္ဓဘာသာ မိရိုးဖလာကိုးကွယ်သူများက နှစ်သစ်ကူးတွင် နွားသတ်လေ့ဟိသည်။ နွားဈီးက ခေါင်ခိုက်လာသဖြင့် မတတ်နိုင်၍ (မေလေး မေလုံး) ဂိုဏ်းသားများက ဘာသာသစ်ထွင်ခြင်းဖြစ်သည်ဟုဆိုသည်။ (မေလေး မေလုံး) ဇာပိုင်လဲ မီးကြည့်သောအခါ (မေလေး မေလုံး) မှာ ညီအစ်ကိုဖြစ်ကြောင်း။ မေလေးမှာ ပိန်ပန်ပါးပါးဖြစ်ပြီး တာဝတိံသာနတ်ပြည်၌ ဥပုသ်စောင့်ပြီး ပြန်လာသည်။ ဥပုသ်စောင့်ခသောနီရာမှာ ကောင်းကောင်းချမ်းအီးသဖြင့် သံချောင်းတောင် ကွေးကောက်သည်ဟုဆိုသည်။

(မေလေး မေလုံး) ရွာများကို မ၀င်မိဖို့ သတိပီးပြောဆိုကတ်ပါသည်။ (မေလေး မေလုံး) ဂိုဏ်းသားများက တောင်ယာခွတ်သည်ကိုလည်း တားမြစ်သည်။ ၀ါးခွတ်စားသည်ဟုဆိူသည်။ နောက်ပိုင်း တောင်ယာမလုပ်သဖြင့် အစားရိက္ခာအခက်အခဲကြုံရသည်ဟုပြောပါသည်။ ယခုအချိန်ထိ (မေလေး မေလုံး) ဂိုဏ်း ဟိသိမ့်ရေလားဆိုသည်ကို အတိအကျမသိပါ။ ရွာတရွာတွင် (မေလေး မေလုံး) ဂိုဏ်းသားများနှင့် ဗုဒ္ဓဘာသာရွာသားများ တခြမ်းစီခွဲ၍ တရွာတည်းအတူနီကတ်ပါသည်။ (မေလေး မေလုံး) ဂိုဏ်းသားများက စာလည်းထွင်ထားသည်။ အဂ်လိပ်အက္ခရာလည်းမဟုတ်ပါ။ ကိုယ်ပိုင်အက္ခရာဖြင့် တီထွင်ထားခြင်းဖြစ်သည်။ (မေလေး မေလုံး) ဂိုဏ်းသားများ၏အိမ်ဝင်ဝတွင် စာတမ်းချိတ်ဆွဲထားသည်။ မြိုဘာသာစကားဖြင့် ဘုရားဝတ်ပြု ရွတ်ဖတ်သံများကိုလည်း ကိုယ်တိုင်ကြားခရသည်။ အဓိပ္ပါယ် ဇာလဲဆိုသည်ကိုကား မမီးဖြစ်ခပါ။ စကားစပ်မိ၍ပြောရလျှင် ရွာတရွာတွင် တောင်ယာခွတ်ထားသည့်သစ်ပင်ကြီးတပင်မှာ လူလေးငါးယောက်ဖက် ဆင်တထိုင်စာကြီးသည်။ တောင်ယာမီးတိုက်ထားသဖြင့် တခြမ်း မဲတူးပြီး မီးလောင်ထားသည်။ ၄င်းသစ်ပင်ကိုကြည့်ပြီး နှမြိုးစိတ်ဖြင့် ငိုချင်စိတ်တောင်ပေါက်သည်။ (မေလေး မေလုံး) ဂိုဏ်းသားများက သစ်တောများပြုန်းတီးခြင်း (သို့မဟုတ်) အတည်တကျရွာထောင်လိုခြင်းကြောင့်လည်းကောင်း တောင်ယာခွတ်သည်ကို တားမြစ်ခြင်းဖြစ်နိုင်သည်။

နောက်တခု ထူးခြားသည်မှာ နောင်ရိုးကိုဖြတ်ကျော်ခြင်းဖြစ်သည်။ နောင်ရိုးမှာ မြိုတောင်တွင် အမြင့်ဆုံးတောင်ဖြစ်သည်။ နောင်ရိုးကိုဖြတ်ကျော်သောအခါ ချောက်ကမ်းပါး၌ ခြီတဖ၀ါးစာ ကျောက်ထရံကို လက်ဝါးနှစ်ဖက်ဖြင့်တွယ်ကပ်ပြီး ဖြတ်ရသည်။ အောက်တွင် အလျှူတရာနက်သောချောက်ဟိသည်။ အောက်သို့ မကြည့်မိဖို့ သတိပီးပါသည်။ ကျောက်ထရံကို လက်ဝါးကပ်လျှက် ခြီတဖ၀ါးချင်း ဘယ်မှညာသို့ ရွှိပြီး ပေ (၅၀) ခန့် ဖြတ်ရသည်။ အထုပ်အပိုးဖြင့်မဖြတ်ဝန့်သဖြင့် အထုပ်အပိုးများကို ရွာသားများကိုသယ်ခိုင်းသည်။ အောက်ကို ငုံ့မကြည့်ကဲ့ဆိုလျှင် ကြည့်ချင်စိတ်က ပိုဖြစ်လာသည်။ လက်ဝါးနှစ်ဖက်ကို ကျောက်ထရံ၌ကပ်လျှက် ခေတ္တရပ်ပြီး ချောက်အောက်ဖက်သို့ တချက်စောင်းကြည့်မိသည်။ သို့သော် အသဲယားလာသဖြင့် ချက်ချင်းမျက်နှာလွှဲလိုက်ရသည်။ ရွာသားများမှာ အထုပ်အပိုးများဖြင့် တမိနိတောင်မကြာဖြတ်ကျော်ပြီးလားသည်။ အကျွန်ုပ်ကား ငါးမိနိခန့်ကြာသည်။ ၄င်းချောက်ကမ်းပါးကို မဖြတ်ဘဲ တောင်ကြောင်းအတိုင်းကျော်ဖြတ်လျှင် တမွန်းတည့်စာခရီး ပိုကြာသည်ဟုဆိုသည်။

ချောက်ကမ်းပါးကိုဖြတ်ပြီးသည်နှင့်ချက်ချင်း ၀ါးလှီကားဖြင့် ချောက်အောက်သို့ဆင်းရသည်။ ၀ါးလှီကားမှာလည်း (၉၀ံ) မတ်စောက်သဖြင့် အသဲယား၍ ကြောက်ဖို့ကောင်းသည်။ ၀ါးလှီကားဖြင့်ဆင်းလိုက် ခြီကျင်လျှောက်လိုက် သုံးလေးခါဆင်းပြီးခါမှ ချောက်ကမ်းပါးအောက်သို့ရောက်သည်။ ၄င်းနောင်ရိုး ချောက်ကမ်းပါးကိုဖြတ်ကျော်ပြီး ရွာနှစ်ရွာသုံးရွာခန့်ဆက်လားပြီးမှ အကျွန်ုပ်ရို့နောက်ကြောင်းပြန်လှည့်ရန်ဆုံးဖြတ်လိုက်သည်။ ဆက်လားမည်ဆိုသော် နောက်ထပ် မြိုရွာအများကြီးကျန်သိမ့်ရေဟု ပြောသည်။ အပြန်ခရီးတွင်လည်း လာစဉ်က ဆင်းခရသော လှီကားထစ်များကို ပြန်တက်ရသည်။ လာစဉ်ကဖြတ်ခရသော ချောက်ကမ်းပါးကို ပြန်ဖြတ်ရသည်။ အပြန်ခရီးတွင် အကျွန်ုပ်ရို့နှင့်အတူ မြိုမချေ သုံးယောက်လောက်ပါသည်။ ပယိုင့်တောင်းကိုယ်စီနှင့်ဖြစ်သည်။ သူရို့ကား လားနီကျဖြတ်နီကျဖြစ်၍ ထူးခြားမှုတစုံတရာမဟိ။ အီးအီးသက်သာဖြတ်ကျော်လားကတ်ပါသည်။

နောက်ရိုးကိုနောက်တခေါက်ပြန်ဖြတ်ပြီး နောက်ရွာတရွာတွင် တညအိပ်သည်။ ကောက်သိမ်းပြီးစဖြစ်သဖြင့် ရွာသားများ ၀ိုင်းဖွဲ့အရက်သောက်လျှက် ပျော်ပါးလျှက်ဟိသည်။ အကျွန်ုပ်ရို့ညအိပ်သောအိမ်တွင် (၁၈) နှစ် (၁၆) နှစ် (၁၄) နှစ်အရွယ် သမီးသုံးယောက်ဟိသည်။ အားလုံးသူမှာ အသားဖြူဖြူဝင်းဝင်းဖြစ်သည်။ အပေါ်ပိုင်းင်္အကျီဝတ်မထား။ သဘာဝအတိုင်းဖြစ်သည်။ လှအားကြီး၍ စိတ်ကိုမနည်းထိမ်းထားရသည်။ အကြီးဆုံးသမီးမှာ အိမ်ထောင်ကျပြီးသားဖြစ်မည်ဟု ခန့်မှန်းရသည်။

အပြန်တွင် အကျွန်ုပ်ရို့ ကျောက်တန်းလမားဖက်ကဆင်းပါသည်။ လမားချောင်းကိုဖြတ်ရသည်။ ရီမှာ ဒူးလောက်နက်သည်။ ချောင်းတလျှောက်တွင် ၀ါးဖောင်များနှင့် ယာယီတဲများကို အများအပြားတွိခရသည်။ ချောင်းဖျားပိုင်းမြီပြန့်မြိုရွာတရွာတွင် တညအိပ်သည်။ ၄င်းမြိုရွာထဲတွင် ရခိုင်သားအိမ်တအိမ်တွိရသည်။ သမီးသည်မှာ အပျိုပေါက်ချေဖြစ်နီပြီးဖြစ်သည်။ အမိသည်ကိုကား မမြင်ခရ။ အစ်ကိုအေးမောင်အသတ်ခံရသည်မှာ ဤချောင်းဖျားဒေသဖြစ်မည်ဟု ခန့်မှန်းရသည်။

အချုပ်ဆိုရလျှင် မြိုလူမျိုးများသည် လူမျိုးကြီးများဖြစ်သည်။ ဆရာထွန်းရွှေခိုင်၏ဆောင်းပါးတပုဒ်တွင် မြိုလူမျိုးများမှာ ထိုင်း လာအို ကမ္ဘောဒီးယားဖက်တွင်လည်း ပြန့်ကြဲလျှက်ဟိကြောင်းဖတ်ဖူးသည်။ နောက် Discovery တွင် ထိုင်းစကားပြောတတ်သော မြိုလူမျိုးများကို မြင်တွိဖူးသည်။ မြိုလူမျိုးများသုံးသော ညှင်းပုလီမှာ ၀ါးပုလီများကို အတိုအရှည်စီတန်း၍ပြုလုပ်ထားသော ဒူရိယာတမျိုးဖြစ်သည်။ ထိုထိုင်းစကားပြောတတ်သော လူမျိုးစုမှာလည်း မြိုလူမျိုးများကဲ့သို့ ညှင်းပုလီဒူရိယာပြုလုပ်ပုံချင်းတူညီသည်။ ဆရာထွန်းရွှေခိုင်၏ဆောင်းပါးကိုထောက်၍လည်းကောင်း မြိုလူမျိုးများတီးမှုတ်သည့် ညှင်းပုလီကိုထောက်၍လည်းကောင်း ထိုထိုင်းစကားပြောတတ်သောမျိုးနွယ်စုမှာ မြိုလူမျိုးများဖြစ်နိုင်ကြောင်းခန့်မှန်းရပါသည်။ ဆက်လက်၍ သုတေသနပြုဖော်ထုတ်သင့်သည်။

ဟာရဘင်းသို့

ဟာရဘင်းသို့
==========

ကျွန်တော်နှင့် ခိုင်မြတ်ကျော် (ယခု နရိဉ္စရာသတင်း အယ်ဒီတာချုပ်) ရွာတော်ပရဟိတဆရာတော် ဦးဝါယမိန္ဒရောက်နီသည်ဟုသတင်းကြား၍ ဖလောင်းချိတ်ျေကျာင်းကြီးကျောင်းသို့လားတွိဖြစ်ပါသည်။ သို့သော် ဆရာတော်မှာ ရွာတော်ပရဟိတဆရာတော်မဟုတ်ပဲ ဟာရဘင်းပရဟိတဆရာတော် ဦးရာဇိန္ဒဖြစ်နီပါသည်။ လူမှားပြီးရောက်လားသော်လည်း (၈၈) အရေးအခင်းနှင့်ထွက်ပြီးပါလတ်သော ကျောင်းသားများဖြစ်၍ ဆရာတော်က အကျွန်ုပ်ရို့နှစ်ယောက်အား သူ၏ဘုန်းတော်ကြီးကျောင်းတွင်နီထိုင်ရန်ခေါ်ယူလားပါသည်။ ၁၉၈၉ ခု နှောင်းပိုင်းလောက်ဖြစ်မည်ဟု ခန့်မှန်းရပါသည်။ ဟာရဘင်းရွာသည် ဗိုလ်ချင်းပြန်ရို့ အနောက်ဘင်္ဂလားသို့ ထွက်ပြီးတိမ်းယှောင်လာစဉ်က တည်ခသောရွာဖြစ်ပါသည်။ ဗိုလ်ရာဇာစစ်ကြောင်းနှင့်အတူလိုက်ပါလာသော ဗိုလ်မှုးကြီးကြာဖြူအောင်လည်း ဤရွာတွင် အပျိုကြီးမငွေစိန်နှင့်အိမ်ထောင်ကျပါသည်။ မငွေစိန်နှင့် နားဖောက်ပီးသူမှာ ကိုအောင်ကျော်သိန်း (မင်းပြား) ဖြစ်သည်။ ယခု ပြည်ထဲသို့ ပြန်ဝင်လားပြီးဖြစ်သည်။ ဆီးချိုရောဂါဖြင့်ကွယ်လွန်ချိန်မှာလည်း ဤရွာ၌ပင် ကွယ်လွန်လားပါသည်။ ဆရာတော်၏ကျောင်းတွင် ယခင် AIO အတွင်းရေးမှုးဟောင်း မောင်သျှင်ကြီးစိန်လှမောင်လည်း နီထိုင်လျှက်ဟိသည်။ မောင်သျှင်ကြီးသည် ဗကပမှ အမျိုးသားရေးလိုင်းသို့ ဦးစွာပထမ ကူးပြောင်းလာသော အတွေးအခေါ်အမြောအမြင်ဟိသော ခေါင်းဆောင်တဦးဖြစ်သည်။ အကျွန်ုပ်ရို့ရောက်လားချိန်၌ပင် အသက် (၇၀) ကျော်နီပြီးဖြစ်သည်။ မောင်သျှင်ကြီး ဟာရဘင်းပရဟိတကျောင်း၌ဟိစဉ်ပင်လျှင် ထောင်တည်မော်ကွန်းကို မောင်သျှင်ကြီးကျော်မြသာလက်ထဲသို့ မူပွားတစောင်ပီးထားနိုင်ခပါသည်။ မောင်သျှင်ကြီးလက်ထဲ၌ ရမ်းဗြဲတောင်ကျောင်းဆရာတော်ရွီးသော ရခိုင်ရာဇ၀င်သစ်ကျမ်း ဒုတိယတွဲလည်းဟိသည်။ ဗိုလ်ချင်းပြန်တော်လှန်ရေး အင်တန်များများအသေးစိတ်ပါသည်။ ဗိုလ်ချင်းပြန်တော်လှန်ရေးအကျဉ်းချုပ်ကို အကျွန်ုပ်က လက်ရွီးဖြင့်ကောက်နှုတ်၍ အိန္ဒိယသို့လားသောအခါ ကော်ပီကူးယူလားပါသည်။ နောင်အခါ ရခိုင်တော်လှန်ရေးနိဒါန်းခေါင်းစဉ်တပ်လျှက် ရခိုင်ကျောင်းသားများကွန်ကရက် (ASC)  (အိန္ဒိယ) နာမည်ဖြင့် Type ရိုက်ပြီး ဖြန့်ဝီခပါသည်။ အိန္ဒိယခရီးစဉ်အကြောင်းကို နောက်မှ ဆက်ရွီးပါမည်။ ယခုလောလောဆယ်တွင် ဟာရဘင်းအကြောင်းအနည်းငယ် ဆက်ရွီးပါဦးမည်။

ဟာရဘင်းပရဟိတကျောင်းမှာ ဟာရဘင်းရွာ၏တောင်ဖက်ခြမ်းတွင်ဟိသည်။ ရွာနှင့်ဘုန်းကြီးကျောင်းအကြား ချောင်းချေတခုဟိသည်။ ချောင်းဆိုသော်လည်း ယင်းလောက်မကြီးပါ၊ မြောင်သာသာရာဟိသည်။ ရီချိုချောင်းဖြစ်သဖြင့် ရွာသားများအတွက် ရီချိုး အ၀တ်ဖွတ် ကောင်းကောင်းအသုံးကျသည်။ ချောင်းတလျှောက် ကြခတ်ဝါးပင်များစိုက်ပျိုးထားသဖြင့် အရိပ်မြိုင်ပြီး စိမ်းလမ်းစိုပြေဟိသည်။ ၄င်းချောင်းကိုကျော်၍ ကိုက်တရာလောက်တောင်မ၀ီး တမိနစ်ခန့်လမ်းလျှောက်လားလျှင် ဘုန်းကြီးကျောင်းသို့ရောက်သည်။ ဘုန်းကြီးကျောင်းမှာ ရွာဖက်မြောက်ဖက်သို့မျက်နှာမူလျှက် ပရဟိတကျောင်းဆောင်မှာ ဘုန်းကြီးကျောင်းနှင့်ရှိဆိုင် ရွာကိုနောက်ခိုင်းလျှက် မြီထိုင်သံဖြူမိုး ပေတရာခန့် ရှည်လျားလျားအဆောက်အဦးဖြစ်သည်။ ဘုန်းကြီးကျောင်းနှင့် စာသင်ကျောင်းဆောင်အကြားတွင် ကွင်းပြင်ကျယ်ဟိသည်။ ၄င်းကွင်းပြင်တွင် မိုးထစောစောကျောင်းဖွင့်တိုင်း ရခိုင်နိုင်ငံတော်တေးခြင်းကို ဆိုသည်။ ရခိုင်နိုင်ငံတော်တေးခြင်းအဖြစ် "ရက္ခပူရိ" တေးခြင်းကို သတ်မှတ်ထားသည်။ ကျောင်သူကျောင်းသား (၇၀) ကျော်ခန့်ဟိသည်။ စစ်တကောင်းတောင်တန်းနယ်အ၀ှမ်းမှ ဆင်းရဲသူဆင်းရဲသား ကျောင်းအိပ်ကျောင်းစားအချေသူငယ် (၂၀) ကျော်ခန့်ဟိသည်။ ကျောင်းသားအများစုမှာ ရွာကလာတက်သည်က များသည်။ ပရဟိတကျောင်းမှာ (World Vision) အကူအညီဖြင့်ဆောင်လုပ်ထားသောကျောင်းဖြစ်သည်။ မြန်မာပြည်တွင် ယခုအချိန်၌ (World Vision) ရောက်လျှက်ဟိသည် မဟိသည်ကိုကား အတိအကျမသိ။

 ဗကဗမှ ထွက်လာသူ ဆီးမှုးသိန်းထွန်းအောင်ရို့သားအဖလည်း ရွာ၌နီသည်။ ကိုသိန်းထွန်းအောင်မှာ ပရဟိတကျောင်း၌ ကျမ္မာရီးမှုးအဖြစ်အလုပ်ရ၍ လစ၀င်ငွေရသည်။ ရမလပဥက္ကဌအဖိုးမောင်စိန်ညွန်၏သားလည်း ပရဟိတကျောင်း၌နီသည်။ ဘင်္ဂလားဆယ်တန်းအောင်ဖို့ကြိုးစားသော်လည်း မအောင်နိုင်ဖြစ်နီသည်။ ဘင်္ဂလီဘာသာစကား၌ အားနည်းသောကြောင့်ဖြစ်သည်။ ပရဟိတကျောင်းတွင် စေတနာပေါက်ဆရာအဖြစ် အချေများအား စာသင်ပီးသည်။ ယခုနောက်ပိုင်း လုံးဝသတင်းမကြားလီပျာယ်။ အဆက်အသွယ်အားလုံးပြတ်တောက်လားသည်။ နောက် ဆံဖြူမောင်ချစ်လည်း ရွာ၌နီသည်။ ကိုမောင်ချစ်မှာ အရေးအခင်းကြောင့် စစ်တွေမှထွက်ပြီးလာသူဖြစ်ပြီး ရွာ၌ဆွီမျိုးများဟိသဖြင့် ဆွီမျိုးများအိမ်၌နီသည်။ ရခိုင့်တော်လှန်ရီးအဖွဲ့အစည်းများကို အယုံအကြည်မဟိသဖြင့် တော်လှန်ရီး နိုင်ငံရီးနှင့် ကင်းကင်းယှင်းယှင်းနီသည်။ နောက်ပိုင်း ဒက္ကသို့လားရောက်၍ ဆီးဆိုးပန်းရိုက်လုပ်ကိုင်သည်။ အစပိုင်း စီးပွားရီးလုံးဝ အဆင်မပြေ။ ယခု အိမ်ထောင်ကျလျှက် စီးပွားရီးလည်းတည်ငြိမ်လားပြီးဖြစ်ကြောင်းကြားသိရသည်။ နောက်တယောက်မှာ (AIO) ရဲဖော်ဟောင်း ကိုစောထွန်း အိန္ဒိယနိုင်ငံ အန္ဒမန်ကျွန်း၌ ဗိုလ်ရာဇာရို့နှင့်အတူ လုပ်ကြံသတ်ဖြတ်ခြင်းခံရသူဖြစ်သည်။  ကိုစောထွန်းလည်း ဟာရဘင်းရွာထဲ၌နီသည်။ ကိုစောထွန်းမှာ မြောက်ဦးမြို့ မြက်ရိပ်ကျွန်းတဖက်ကမ်း ပန်းမြောင်းဇာတိဖြစ်သည်။

ဟာရဘင်းရွာသည် အယင် အိမ်ခေါင်ပေါ် တထောင်ကျော်ဟိသော ရွာကြီးတရွာဖြစ်သည်။ နောက်ပိုင်း ကုလားလူဦးရွီများလာသဖြင့် ရခိုင်ပြည်ဖက်သို့ ပြောင်းရွှိလားခကတ်သဖြင့် ယခုအခါ အိမ်ခြီ (၂၀၀) ခန့်ရာ ကျန်လိုက်ပြီးဖြစ်သည်။ သို့သော် ဘုန်းကြီးကျောင်းကား ခြောက်ကျောင်း။ ပရဟိကျောင်းနှင့် လက်ဝဲဖက်ကပ်ရပ် တခြားတောင်ကုန်းတခုတွင် ဘုန်းကြီးကျောင်းတကျောင်းဟိသည်။ ညာဖက်တွင် တောင်ကြက်ဦးကျောင်းဟိသည်။ ယင်းနောက် ရွာကျောင်းတကျေင်းနှင့် မရမာကြီးလူမျိုးများကိုးကွယ်သော တောကျောင်းတကျောင်း။ တောကျောင်းတွင် ကျောက်ဖြူက ကိုတော်ချေတပါးကျောင်းထိုင်သည်။ တောင်ကြက်ဦးကျောင်းတွင် အကျွန်ုပ်ရို့နှင့် ရန်ကုန်ကတည်းကသိသော ဆရာတော်တပါးကျောင်းထိုင်သည်။ တောင်ကြက်ဥကျောင်းကိုကား လယ်ကွင်းများပတ်ပတ်လည်ဝိုင်းထားသည်။

ဟာရဘင်းရွာ၌ထူးခြားသည်မှာ အကျွန်ုပ်ရို့ဟိစဉ် ရခိုင်မရမာ သင်္ဃကောင်စီအစည်းအဝေးကျင့်ပခြင်းဖြစ်သည်။ မရမာဆိုသည်မှာ မရမာကြီးလူမျိုးမဟုတ်ပါ။ ဗိုလ်မင်းထောင်မှ ရခိုင်များက ရခိုင်မခံ မိမိကိုယ်ကို မရာမာလူမျိုးဟုခံယူကတ်ပါသည်။ ဤ မရမာဝေါဟာရမှာ အလွန်အငြင်းပွားရသော ဝေါဟာရဖြစ်သည်။ မြီပြန့်ရခိုင်များက မိမိကိုယ်မိမိ ရခိုင်ခံယူကတ်သည်။ ဗိုလ်မင်းထောင်ဗိုလ်မင်းများက သူရို့သည် မင်းရာဇာကြီးသိမ်းယူခသော ပဲခူးနန္ဒဘုရင်၏သားတော်အနွယ်အဆက်ဟု ခံယူကတ်သည်။ စကားပြောလျှင်ကား ရခိုင်စကားပြောပါသည်။ သူရို့၏အဆို မှားသည်ဟု ပြော၍မရ။ ဆရာကြီးဦးစံသာအောင်မကွယ်လွန်ခင်နောက်ဆုံးထုတ်ခသော ရခိုင့်တန်ဆောင်မဂ္ဂဇင်းအမှတ် (၁ရ) လား (၁၈) လား အတိအကျမမှတ်မိ။ ယင်းမဂ္ဂဇင်းပါ ဆရာကြီးကိုယ်တိုင် အင်္ဂလိပ်ဘာသာဖြင့်ရွီးသားသောဆောင်းပါးတွင်လည်း ထိုသို့ဆိုထားပါသည်။ ဤသမိုင်းဟာကွက်ကို ရခိုင်သမိုင်းသုတေသီကြီးများများစားစား သုတေသနပြုဆောင်းပါးရွီးသားသည်များကို မတွိရ။ ဆရာကြီးစံသာအောင်၏ဆောင်းပါးမှာရာ အရိပ်အမြွက်ဖော်ပြထားသည်။ သို့သော် မည်သည့်ကျမ်းကို ကိုးကားသည် မည်သည်ကို အထောက်အထားပြုသည်ဟူ၍ကား ဖော်ပြမထား။ သို့သော် မရမာလူမျိုးများကား သူရို့၏သမိုင်းကိုချဲ့ကား၍ သူရို့သည် နန္ဒဘုရင်၏သားနှင့် ရခိုင်ဘုရင့်သမီးတော်၏အဆက်အနွယ်များဟု လုပ်ကြံဇတ်လမ်းဖန်တီးထားသည်ကိုလည်း မရမာဘုန်းတော်ကြီးတပါး ရွီးသားသော ရွာတော်ထုတ် မဂ္ဂဇင်းတအုပ်တွင် အင်္ဂလိပ်ဘာသာဖြင့် ဖတ်ခရပါသည်။ ယုတ္တိယုတ္တာကားမဟိ။ အထောက်အထားအကိုးအကားလည်းမဟိ။ စိတ်ကူးယဉ်ပါးစရာဇ၀င်အား လက်ကမြင်းထားခြင်းဖြစ်သည်။ စစ်ယှုံးဘုရင်၏သားတော်နှင့် စစ်နိုင်ဘုရင်၏သမီးတော်ကို ထိမ်းမြားပီသည်ဆိုခြင်းမှာ ယုတ္တိကင်းမဲ့လှသည်။ အကျွန်ုပ် အိန္ဒိယသို့မလားမှီ ရွာတော်၌ ကိုယ်ယင်ဝတ်ဖြင့် တ၀ါဆိုစဉ် ကိုယ်တော်ဝါယမိန္ဒပြောသည်မှာကား သူရို့ဟုတ်ချင်ဟုတ်မည် ငါရို့ကားမဟုတ်ဟုဆိုသည်။

ဇတ်လမ်းကိုပြန်ဆက်ရသော် ရခိုင်မရမာ သင်္ဃကောင်စီအစည်းအဝေးတွင် အကျွနင်္ုပ်ရို့ သုံးရက်လုံးလုံးဇတ်ကရပါသည်။ ဇတ်လိုက်မင်းသမီးမှာ မန္တလေးဇာတိ ဗမာအမျိုးသမီးတဦးဖြစ်သည်။ ဘင်္ဂလီကုလားတယောက်နှင့်ခိုးရွာလိုက်လာပြီး သူ့ယောက်ျးဇာတိ ဘင်္ဂလားတွင် နှစ်ပေါင်းနှစ်ဆယ်ကျော်ခန့် အခြီချ၍ သားကြီးမယားကြီးရခါပြီးမှ သူ့လင်သည်က နောက်မယားယူလားသဖြင့် မခံမရပ်နိုင်ဖြစ်ပြီး အိမ်ထောင်ကွဲကာ ဟာရဘင်းတွင် ရောက်ဟိနီထိုင်သူဖြစ်သည်။ သူမ၏ပြောပြချအရ သူနှင့်မယူခင် သူ့ယောက်ျားက ရခိုင်ခံပြီးလိမ်ခိုယူလာခြင်းဖြစ်ကြောင်း ဘင်္ဂလားသို့ရောက်ပြီးမှရာ ကုလားဖြစ်ကြောင်းသိရကြောင်း အကျွန်ုပ်ရို့အား ရင်ဖွင့်ပြောဆိုပါသည်။ ဗိုလ်မှုးကြာဖြူအောင်၏ဇနီးမယားလောင်း အပျိုကြီးမငွေစိန်ရို့မိသားစုက သနားသဖြင့် သူရို့အိမ်တင်၍ ကြည့်ရှုစောင့်မထားပါသည်။

ဇတ်ကရာတွင် ကိုမြတ်ကျော်က ဇတ်ညွှန်းရွီး၍ အကျွန်ုပ်က လူသတ်ဘရ၀ါအခန်းက သရုပ်ဆောင်ရပါသည်။ ရယ်ရသည်မှာ ကျွန်ုပ်ကား ဇတ်တိုက်သောအခါ ကောင်းကောင်းနားမဆောင် မင်းသားမင်းသမီးလွမ်းချိန်မရောက်ခင် မင်းသမီးအား ကားစင်ထက်၌ အကျွနင်္ုပ်က လိုင်ဖင်းဖြတ်လိုက်ခြင်းဖြစ်သည်။ အကျွန်ုပ်လိုင်ဖင်းဖြတ်လိုက်သော်လည်း မင်းသမီးကားမသီ အူဆို့ပါအောင်ရယ်ရပါသည်။ အကျွန်ုပ်လည်း ဇာလုပ်၍ ဇာကိုင်ရမှန်းမသိ။ ကြောင်တိကြောင်တောင်နှင့် ပရိသတ်ပါးမှာ အဆဲကျသည်။ ဇတ်ညွှန်းဆရာ ကိုမြတ်ကျော်လည်း ကောင်းကောင်းမာန်ပါပါသည်။ အကျွန်ုပ်ကား ကိုယ့်အပြစ်နှင့်ကိုယ် ငြိမ်ခံနီလိုက်ရသည်။ ဇတ်လိုက်လုပ်သူမှာ ဟာရဘင်းရွာဇာတိ ပရဟိတကျောင်း၌ ကျောင်းဆရာလုပ်နီသူ အရပ်ရှည်ရှည် အရုပ်ဖြောင့်ဖြောင့် ကိုကာလာဖြစ်သည်။ ယခုလည်း ယင်းပရဟိတကျောင်း၌ ကျောင်းဆရာလုပ်၍ ဟိသည်မဟိသည်ကိုကား သတင်းမကြားမိပါပျာယ်။

ဘုန်းကြီးကျောင်းတွင် ရခိုင်ပြည်မှ ကိုယ်တော်ချေတပါးလည်းဟိပါသည်။ အသံကောင်းသည်။ ဇတ်ကရာတွင် ရခိုင်တေးခြင်းဖြင့်နောက်ခံရခိုင်တေးခြင်းများ ဆိုပီးပါသည်။ တီးဝိုင်းအား အခင်ကြီးစောရာဇာ (မင်းပြား) က ဦးစီးဆောင်ရွက်ပီးပါသည်။ စစ်တကောင်းတောင်တန်းနယ်၌ ဒုတိယအိမ်ထောင်ကျလျှက်ဟိသည်။ Facebook စာမျှက်နှာတွင် ဆောင်းပါးများရွီးသားသည်များကိုလည်း မကြာမကြာတွိမြင်ရသည်။ အကျွန်ုပ်ကား ဦးမြ၀ါဒုံးယိမ်းကို ဦးဆောင်ပါသည်။ ကိုအောင်ကျော်သိန်းက ဟာသနှင့် ရထားပန်းယိုင် ယိမ်းအကများကို ဦးစီးသည်။ ကိုသိန်းထွန်းအောင်ကား ငပျင်းထွေ၊ ရမလပဥက္ကဌ အဖိုးမောင်စိန်ညွန်၏သားကား မယ်ဒလိန်ဖြင့် ရခိုင်တေးခြင်းအဆိုတော်၊ မောင်တောက အစ်မတယောက်လည်း ရခိုင်ရိုးရာအက စေတနာဖြင့်လာသင်ပြပီးပါသည်။  မြစ်နားရွာ၌အိမ်ထောင်ကျနီသူ ကိုကျော်မင်းက ခေတ်ပေါ်ရခိုင်တေးခြင်းများဖြင့် ဖြေဖျော်ပါသည်။ ဘင်္ဂလား၌ ရခိုင်ရိုးရာဇတ်ကခြင်းမှာ ပထမဆုံးအကြိမ်ဖြစ်၍ ရွာသူရွာသားများ အလွန်ကြိုက်နှစ်သက်ကတ်ပါသည်။

ဟာရဘင်း၌နီစဉ် ရခိုင်ဝေါဟာရ လေးလုံးကို သတိထားမိပါသည်.။ (၁) ပတ္တမြား (၂) တောအူ (၃) မျှ (၄) ကိုဘင် ယှားပါးရခိုင်ဝေါဟာရလေးလုံးဖြစ်သည်။ (ပိုးမီးစုန်း) ကို မြန်မာများက (ပိုးစုန်းကြူး) ဟုခေါ်သည်ကို ရခိုင်သားဥချေပေါက်ချေက အစသိသည်။ စကားစပ်မိ၍ ကျွန်သက် နှစ် (၂၂၉) လား (၂၃၀) လား အတိအကျမမှတ်မိလိုက်ပါယာ။ မင်းနီမြို့တော် မြောက်ဦးရွှီမြို့သားတိ လဒမှိုင်နိမှာထုတ်တေ ကဗျာစာအုပ်တအုပ်မှာ (ပိုးစုန်းကြူး) ဟု အရှက်အသရေကင်းမဲ့စွာ ခိုးချထားသည်ကို ဖတ်လိုက်ရပါသည်။ ထို့ကြောင့် (ပိုးမီးစုန်း) (ပတ္တမြား) ယှားပါးရခိုင်ဝေါဟာရနှစ်လုံးကို ဖော်ထုတ်ချင်၍ နောက်ဆုံးအပိုဒ်ကို ဖြည့်စွက်ရွီးသားလိုက်ရပါသည်။

တရက်နိညဇာသား ပိုးမီးစုန်းထွက်ပါသည်။ ထိုအခါ အကျွန်ုပ်က ရခိုင်အခေါ်ကို သိချင်၍ ဟာရဘင်းရွာသား ပရဟိတကျောင်း၌နီထိုင်သူ ညအိပ်ကျောင်းသားများအားကြီးကြပ်သူ ကိုအထွန်းချေအား ကောက်ကာငင်ကာ ဗြုန်းခနန်း ကောက်မီးလိုက်ပါသည်။ အစ်ကိုအစ်ကို အေအကောင်ကို အစ်ကိုရို့မှာ ဇာခေါ်ရေလဲ။ ထိုအခါ ကိုအထွန်းချေက (ပတ္တမြား) ဟုခေါ်ကြောင်းပြောပါသည်။ နောက်အသုံးတခုမှာ (မျှ) အသုံးဖြစ်ပါသည်။ အချေခါ သင်္ချာတွက်သောအခါ အဖြေမှာ မည်မျှဖြစ်သနည်း မီးခွန်း။ (မျှ) အသုံးကို မြန်မာစာတွင်ရာတွိရသည်။ မြန်မာစကားတွင် လုံးဝမတွိရ။ ဟာရဘင်းရွာကိုရောက်မှ (မျှ) အသုံးကို အခုထက်ထိ ရခိုင်သားများ ပြောဆိုသုံးနှုံးလျှက်ဟိကြောင်းသိရပါသည်။ ဈီးပြုသောအခါ ဈီးဝယ်သောအခါ (မျှလောက်လဲ) ဟု ဈီးမီးပြောဆိုသည်ကို ကြားသိခရပါသည်။ အကျွန်ုပ်ရို့ ဟာရ်ဘင်းဘုန်းတော်ကြီးကျောင်း၌ တနှစ်လောက်နီဖြစ်ပါသည်။ နွီခါသားရောက်၍ (ဝေါ) ငှက်မြည်သောအခါ အကျွန်ုပ်က ကိုအထွန်းချေအား အေငှက်ကို ဂိုးချေရို့မှာ ဇာငှက်ခေါ်ရေလဲ မီးလိုက်ပါသည်။ ကိုအထွန်းချေက (တောအူ) ခေါ်ကြောင်းပြောပြပါသည်။ (ဝေါ) ငှက်ဟုခေါ်သည်ကို အမတ်ကြီးဦးသာနိုးက အကျွန်ုပ်ရို့ဒေလီ၌နီစဉ်ပြောပြဖူးပါသည်။

နောက်အသုံးတခုမှာ (ကိုဘင်) ဟူသော အသုံးဖြစ်သည်။ (ကိုဘင်) ကို ကြီးသူက ငယ်သူကိုခေါ်သောအခါတွင်လည်းကောင်း ငယ်သူက ကြီးသူကိုခေါ်သောအခါတွင်လည်းကောင်း ယဉ်ကျေးသမှုသုံးပါသည်။ ရခိုင်ဝေါဟာရစစ်စစ်ဖြစ်ပြီး ပြည်မရခိုင်ပြည်တွင် ဤအသုံးကို လုံးဝမတွိရပါ။

(တောအူ) အသုံးနှင့်ပတ်သက်၍ ၂၀၀၆ ခုနှစ်လောက်က အကျွန်ုပ် ထိုင်းသို့ ရခိုင်ကျောင်းသားပေါင်းစည်းရီးညီလာခံသို့တက်ရောက်စဉ် ရနောင်းသို့ အလုပ်ကိစ္စဖြင့်လားရောက်လည်ပတ်ဖြစ်ပါသည်။ အကျွန်ုပ်တည်းခိုသောအိမ်မှာ ထားဝယ်လူမျိုးအိမ်ဖြစ်ပါသည်။ အိမ်သျှင်မက ထားဝယ်လူမျိုးဖြစ်ပြီး လင်ယောက်ျားမှာ ရခိုင်လူမျိုးဖြစ်သည်။ ထားဝယ်လူမျိုးစကားပြောသည်ကို အကျွနင်္ုပ်လုံးဝနားမလည်ပါ။ သို့သော် လင်ယောက်ျားကပြောသည်မှာ ထားဝယ်လူမျိုးများနှင့် သုံးလေးလခန့်အတူနီလျှင် အားလုံးနားလည်လားပါရေအစ်ကိုဟု ပြောပြပါသည်။ သူ၏မယားသည်အား ထမင်းစားစဉ် (ဥသြ) ကို အမတို့ ထားဝယ်မှာ ဘယ်လိုခေါ်သလဲဟု မြန်မာစကားဖြင့် မီးဖြစ်ပါသည်။ သူမက (တောယူ) ခေါ်ကြောင်းပြောသည်။ ပြီးလျှင် မြန်မာလို (ပင်စိမ်း) ကို ထားဝယ်ပိုင် ဇာပိုင်ခေါ်ရေလဲ မီးဖြစ်ပါသည်။ (နှုံး) ခေါ်ကြောင်းပြောပါသည်။ ဤ (တောအူ)(တောယူ) (နှုံး) ယှားပါးဝေါဟာရများတိုက်တိုက်ဆိုင်ဆိုင် တူညီနီသည်ကိုထောက်၍ ရခိုင်နှင့်ထားဝယ်မှာ လူမျိုးအတူတူဖြစ်ကြောင်း ကောက်ချက်ချ၍ ရပါသည်။ ဟာရဘင်း၌ဟိစဉ် မောင်သျှင်ကြီးစိန်လှမောင်က ရမ်းဗြဲတောင်ကျောင်းဆရာတော် ရွီးသားပြုစုသော ရခိုင်ရာဇ၀င်သစ်ကျမ်းကို ပီးဖတ်ခိုင်းပါသည်။ ၄င်းရခိုင်ရာဇ၀င်သစ်ကျမ်းတွင် ထားဝယ်လူမျိုးများမှာ ထရိပူရက ရခိုင်သားများဖြစ်ကြောင်းဖော်ပြထားပါသည်။ ရခိုင်ဘုရင်မင်းလက်ထက် အိန္ဒိယဒေသ မငြိမ်သက်မှုများကြောင်း ထရိပူရက ရခိုင်သားများရခိုင်ပြည်မဖက်သို့ ခိုဝင်လာကြောင်း၊ ရခိုင်ဘုရင်က ယခု ရခိုင်ဘင်္ဂလားနယ်စပ် ယခု ဘဂ်လားဖက် အုန်းကျွန်းတွင် နီရာချပီးကြောင်း နောက်ပိုင်း အုန်းကျွန်းတွင်မနီလို၍ ထားဝယ်ဖက်သို့ လှီလောင်းကြီးများဖြင့် ပြောင်းရွိလားကြောင်းဖော်ပြထားပါသည်။ ယခု အကျွန်ုပ်လက်ထဲ၌ ရခိုင်ရာဇ၀င်သစ်ကျမ်းမဟိပါ။ လက်ထဲ၌ဟိသူများ စာမျက်နှာလှန်ဖတ်ကြည့်ပါ။ ဇာရခိုင်ဘုရင်လက်ထက်ကလဲဆိုစွာကို အတိအကျ နာမည်နှင့်တကွ ပြောပြနိုင်ပါလိမ့်မည်။ ကျေးဇူးတင်ဟိပါသည်။ တစုံတခု အတွိအကြုံ ဗဟုသုတ ရဟိလိမ့်မည်ဟု မျှော်လင့်ပါသည်။ (ဟာရဘင်းသို့) အခန်းကို ဤမှာတွင် အဆုံးသတ်အပ်ပါသည်။ လိုအပ်သည်များ ကျကျန်ခသည်များ မှားယွင်းသည်များဟိက ထောက်ပြပီးကတ်ပါ။ ပြန်လည်၍ ပြုပျင်ဖော်ပြပီးလားပါမည်။

 (သာလှဦး) (December 29, 2015) (ဗုဒ္ဓူးနိ)

သပွတ်အူ

သပွတ်အူ
=====

အမှန်မှာ ပထမအစီအစဉ်အရ အကျွန်ုပ်ကား တော်လှန်ရီးလုပ်ရန်မဟုတ်။ ရန်ကုန်၌ တော်လှန်ရီးအတွက် UG လုပ်ပီးရန်ဖြစ်သည်။ အရေးအခင်းနောက်ပိုင်း စစ်တပ်က အာဏာသိမ်းသောအခါ ရခိုင်ကျောင်းသားအများအပြား ဘင်္ဂလားဖက်သို့ ထွက်ပြီးတိမ်းယှောင်လားကြောင်း အကျွန်ုပ်ရို့ သတင်းကြားသိရသည်။ ထို့ကြောင့် ရန်ကုန်တွင်ဟိသော အကျွန်ုပ်ရို့ရခိုင်ကျောင်းသားအုပ်စုက ထိုင်းနိုင်ငံရောက် မြန်မာကျောင်းသားများနှင့်အဆက်အသွယ်လုပ်မည်လား ဘင်္ဂလားရောက် ရခိုင်ကျောင်းသားများနှင့်အဆက်အသွယ်လုပ်မည်လား ဆုံးဖြတ်ရသည်။ ဘင်္ဂလားရောက် ရခိုင်ကျောင်းသားများနှင့်အဆက်အသွယ်လုပ်ရန် ဆုံးဖြတ်လိုက်ကတ်သည်။ အစီအစဉ်အရ ဘင်္ဂလားရောက်ကျောင်းသားများနှင့်အဆက်အသွယ်လုပ်ရန် အကျွန်ုပ်အား ပွဲဦးထွက်စေလွှတ်လိုက်သည်။ လီယာဉ်စရိတ်အား ကိုလှမြင့်က ကျခံပီးသည်။ စစ်တွေတွင် (၁) ညအိပ်ပြီး နောက်နိမိုးထစောစောတွင် သဲချောင်းကုလားရွာမှ စတင်ထွက်ခွာသည်။ ဘုတ်မှာ စစ်တွေမှာ ဘင်္ဂလားသို့ နွားမှောင်ခိုရောင်းသော စက်တပ်ဘုတ်ဖြစ်သည်။ နွားအကောင် (၁၀) ကောင်ခန့်ပါသည်။ ဘင်္ဂလီကုလား (၆) ယောက်လောက်ပါသည်။ ယင်းအထဲတွင် ရခိုင်သား အကျွန်ုပ်တယောက်တည်း။ မိုးချုပ်ခါနီး တက္ကနားသို့ရောက်သည်။ ချက်ချင်းကမ်းမကပ်သိမ့်ဘဲ ဘင်္ဂလားဖက်ကမ်း နတ်မြစ်ထဲတွင် ကျောက်ချရပ်နားထားသည်။ ဘုတ်ကား ခေါင်မိုးလည်းမပါ။ လီကောင်းကောင်းတိုက်သဖြင့် ထမင်းချက်၍မရ ညဇာထမင်းဖောက်ဆပ်စားရသည်။ ည (၉) ချက်တီးခန့်တွင် ရွာသို့ကပ်ပြီး တက္ကနားမြို့သို့ ခရီးဆက်သည်။ တည်းခိုခန်းတွင်တည်းသည်။ ညဇာထမင်းဖောက်ဆပ်စားခရသဖြင့် တညလုံးဝမ်းလားသည်။ မှတ်မှတ်ရရ ဘင်္ဂလားသို့စရောက်သောနိသည် ၁၉၈၈ ခု အောက်တိုဘာလ (၁၀) ရက်နိဖြစ်သည်။

အကျွန်ုပ်၏မူလအစီအစဉ်မှာ ဘင်္ဂလားရောက်ကျောင်းသားများနှင့်အဆက်အသွယ်လုပ်ပြီး ပြည်ထဲသို့ပြန်ဝင်လာကာ ပြည်တွင်းပြည်ပကျောင်းသားလှုပ်လျှားမှုအား ပြည်တွင်းမှ ထောက်ပံ့ပီးရန်ဖြစ်သည်။ သို့သော် ဘင်္ဂလားရောက်ကျောင်းသားများကား ညှိနှိုင်းမရ ဘွဲ့ရကျောင်းသားများအားလက်မခံ ပါယ်ထုတ်လိုက်သည်။ ထိုအချိန်က အကျွန်ုပ်လည်း ဘွဲ့ရခါစကျောင်းသားဖြစ်၍ ပါယ်ထုတ်ခြင်းခံရသည်။ မင်းကိုနိုင် မိုးသီးဇွန်စသော ကျောင်းသားအရေးအခင်းအား ဦးဆောင်ခသောကျောင်းသားခေါင်းဆောင်များမှာ ဘွဲ့ရကျောင်းသားများဖြစ်သည်ကို အသိဥာဏ်မိုက်မဲသော ရခိုင်ကျောင်းသားခေါင်းဆောင်များက သဖောပေါက်နားမလည်။ ကျောင်းသားဥက္ကဌဆန်နီ (တောင်ကုတ်) ဖြစ်သည်။ ကယုချောင်းဘုန်းတော်ကြီးကျောင်း၌ သုံးရက်လုံးလုံးအကြိတ်အနယ်ဆွေးနွေးပါသော်လည်း ပြေလည်မှုမရ ကျောင်းသားဥက္ကဌ၏ကန့်ကွက်မှုကြောင့် ကျောင်းသားစည်းလုံးညီညွတ်ရီး ပြိုကွဲပျက်စီးလားရသည်။ ထိုအချိန်က ပြည်ပရောက်ရခိုင်ကျောင်းသားအဖွဲ့အစည်း၏အတွင်းရေးမှုးမှာ ယခု နယ်သလန်ရောက် ကိုသိန်းအောင်ကျော်ဖြစ်သည်။ သူက သဖောထား ပျော့ပျောင်းသည်။ ကျောင်းသားပေါင်းစည်းရီးကိုလိုလားသည်။ သို့သော် ဥက္ကဌက ကန့်ကွက်သဖြင့် အရာမရောက် ခရီးမပေါက်။ တယောက်မကောင်း တသောင်းပျက်စကားအတိုင်း ကျောင်းသားညီညွတ်ရီး ဖရိုဖရဲ ပြိုကွဲပျက်စီးလားပြီးနောက် တချို့ကျောင်းသားများမှာ ပင်ပန်းဒါဏ်ကိုမခံနိုင်၍ စောစောစီးစီးလက်မြှောက်ဒူးထောက်လားခသည်။ ဒူးထောက်လက်မြှောက်လားခသူများမှာ အကျွန်ုပ်အား ကောင်းကောင်းသိသည်။ ထို့ကြောင့် အကျွန်ုပ်၏ပြည်ထဲသို့ပြန်ဝင်မည့် မူလအစီအစဉ်ကို လုံခြုံရီးကြောင့် ဖျက်သိမ်းလိုက်ရသည်။

အကျွန်ုပ်ရန်ကုန်သို့ပြန်မရောက်လာဘဲ အဆက်အသွယ်ပြတ်တောက်လားသဖြင့် ရန်ကုန်တွင်ကျန်ခသော ကိုမြတ်ကျော်၊ ကိုချိုဇံ၊ ကိုလှကြည် သုံးယောက်လုံး ဘင်္ဂလားသို့ ဆင်းပါလာလတ်သည်။ ထို့ကြောင့် ဘင်္ဂလားသို့ရောက်နီပြီးဖြစ်သော ဦးသန့်အရေးအခင်းကျောင်းသားဟောင်းများဖြစ်သော ဦးအောင်ရွှေ (ကျောက်ဖြူ) ကိုစိုးနိုင် (မာန်အောင်)။ ရွှေဒေါင်ဗိုလ် (ရမ်းဗြဲ) စသော ကျောင်းသားဟောင်းများနှင့်ပူးပေါင်းပြီး ပြည်သူ့ကျောင်းသားများဒီမိုကရက်တစ်တပ်ဦး (ရခိုင်ပြည်) အား ဖွဲ့စည်းလိုက်သည်။ ဥက္ကဌအဖြစ် ဦးအောင်ရွှေအား တင်မြှောက်ပြီး အတွင်းရေးမှုးအဖြစ် ကိုမြတ်ကျော်ကဆောင်ရွက်သည်။ ပြည်ထဲတွင် UG လုပ်ရန် ကိုချိုဇံနှင့် ကိုလှကြည်အား ပြည်ထဲသို့ ပြန်လွှတ်လိုက်သည်။ ပြည်သူ့ကျောင်းသားတပ်ဦး ဖွဲ့စည်းစဉ်ကတည်းက ဦးကျော်ခိုင် (ရခိုင်ပြည်) ယခု Facebook ထက်၌ မကြာမကြာ စာများရွီးသားနီသူလည်း ပါဝင်သည်။

NUFA စခန်း ၀ါးခတ်ချောင်း၌စခန်းထိုင်သော Pure ရခိုင်ကျောင်းသားအဖွဲ့ခေါင်းတောင် ကိုဆန်နီလည်း အများမကြာ လက်မြှောက်ဒူးထောက်လားသည်။ နောက် ကိုအောင်သောင်းရွှေ (မာန်အောင်) ဥပဒေနောက်ဆုံး၌ကျောင်းသားက ဥက္ကဌအဖြစ်ဆောင်ရွက်သည်။ သူလည်းအများမကြာ လက်မြှောက်ဒူးထောက်လားသည်။ နောက် ကိုသန်းဌေး (ကျောက်ဖြူ) က ဦးဆောင်သည်။ ကျောင်းသားနှစ်ဖွဲ့ကွဲနီစဉ်တွင် ရခိုင်ပြည်သီးခြားလွတ်လပ်ရီးအတွက် တိုက်ပွဲဝင်နီသော NUFA က တပ်ဦးထဲမှ ဆွဲနှုတ်၍ ခိုင်ဆန်းအောင်၊ စံသာအောင်၊ ကိုပြည်သိမ်းရို့အား ABSDF (Arakan) ထူထောင်ပီးသည်။ နောက် ကျောင်းသားသုံးဖွဲ့ (မြစ်နားရွာလား ကယုချောင်းလားနီရာအတိအကျ မမှတ်မိ) ဘုရားရင်ပြင်ပေါ်၌ ၁၉၈၉ ခု နှောင်းပိုင်းတွင် တပေါင်းတစည်းတည်းရပ်တည်ရန် ဆုံးဖြတ်လိုက်သည်။ ABSDF (Arakan) နာမည်ဖြင့် ယာယီရပ်တည်ရန်ဆုံးဖြတ်သည်။ ဥက္ကဌအဖြစ် ကိုသန်းဌေးကဆောင်ရွက်သည်။ အကျွန်ုပ်ကား NUFA စခန်းတွင်းတွင် မနီလို အပြင်ကရပ်တည်မည် အဖွဲ့ဝင်အဖြစ်အသိအမှတ်ပြုပါဆို၍ ဥက္ကဌကိုသန်းဌေးကလည်း သဖောတူသဖြင့် အပြင်ကရပ်တည်သည်။ အဖွဲ့ဝင်မဟုတ်ပဲ အပြင်၌ရပ်တည်သောကျောင်းသားများထဲတွင် ကိုညီချေ (မင်းပြား) လည်းပါဝင်သည်။ နောက် ကျောက်ဖြူက ကျောင်းသား လေးငါးခြောက်ယောက်ဟိသည်။ နောက်ပိုင်း ကိုသန်းဌေးအား ဆီးဝါးသုံးစွဲသည်ဟူ၍ စံသာအောင် ခိုင်ဆန်းအောင်ရို့အုပ်စုက ကိုသန်းဌေးအား ထုတ်ပါယ်လိုက်သည်။ ခိုင်ဆန်းအောင်ဥက္ကဌဖြစ်လာသည်။ အကျွန်ုပ်အားလည်း စခန်းတွင်မနီသဖြင့် အဖွဲ့ဝင်အဖြစ်မှ ထုတ်ပါယ်လိုက်သည်။

အတိအကျမမှတ်မိပါ။ အကျွနင်္ုပ်ရို့ဟာရဘင်းသို့ မလားခင်လား လားပြီးမှလား အတိအကျမမှတ်မိလိုက်ပါယာ။ ကျောင်းသားဆယ်ငါးယောက်ခန့် မြစ်နားရွာ သံဖြူကျောင်းတွင် စုပေါင်းနီထိုင်ကတ်ပါသည်။ မြစ်နားရွာတွင် ဘုန်းကြီးကျောင်းနှစ်ကျောင်းဟိပါသည်။ တကျောင်းက ရွာကျောင်းဖြစ်ပြီး မြစ်နားရွာဆရာတော် ကျောင်းထိုင်ပါသည်။ အကျွန်ုပ်ရို့နီသော သံဖြူကျောင်းမှာ ရွာနှင့် အင်တန်ဝီးပါသည်။ ကားလမ်းတဖက် ခြီကျင်လမ်းလျှောက်လျှင် မိနိ (၂၀) နာရီဝက်လောက် လမ်းလျှောက်ရပါသည်။ မှတ်မိသလောက် ကိုမြတ်ကျော်၊ အကျွန်ုပ်၊ ကိုသန်းထွန်း (မင်းပြား) သိန်းမင်း (အောင်သာထွန်း) (ပေါက်တော)(ကွယ်လွန်) စုစုပေါင် ဆယ့်ငါးယောက်လောက်ဖြစ်သည်။ စားစရာငတ်ပြတ်၍ မိုးဦးကျဖားမြည်သဖြင့် ဖားသတ်ရန်ဆုံးဖြတ်လိုက်ကတ်သည်။  ဘုန်းကြီးကျောင်းတောင်ကုန်းပါတ်ဝန်းကျင် ကုလားလယ်ကွက်များသို့ဆင်း၍ ဖားလားကောက်သည်။ ကုလားများ ဓါတ်တောင့်ထိုးသဖြင့် အယင်ကောက်ပြီး အယင်တက်ပြီးလာရသည်။ ဖားတခရင်းလောက်ရသည်။ အကျွန်ုပ်ရို့နီသောကျောင်းဆောင်မှာ ဆရာတော်နီသောကျောင်းနှင့် သီးခြားအဆောင်ဖြစ်သည်။ ၄င်းကျောင်းဆောင်အောက်တွင် ဖားများကို မီးဖုတ်သည်။ ထိုအထဲတွင် ကိုသန်းထွန်း (မင်းပြား) မှာ ဟာသအလွန်ပြောတတ်သူဖြစ်သည်။ ပျော်ပျော်ရွှင်ရွှင်နီတတ်သည်။ သူက ဟာသလုပ်လို၍ ဖားများကို မသီမရှင်သတ်ပြီး မီးဖုတ်သည်။ ဖားများထွက်ပြီးလျှင် ပြန်ကောက်လိုက် ပြန်ထည့်လိုက် ဟာသပြောလိုက်လုပ်သည်။ ကိုမြတ်ကျော်က ကိုသန်းထွန်း မလုပ်ကဲ့၊ ကျွန်တော်လက်တွိ ရွာကို ကျားတောင်လာရေ လက်တွိကြုံဖူးရေ ပြောကေလည်းနားမထောင်။ ဆက်လုပ်သည်။ မကြာခင် ဖားဖုတ်ပြီး၍ အိုးထဲထည့်၍ ကျောင်းထက်တက်သည်နှင့် မုန်းတိုင်းချက်ချင်းတိုက်ပြီး ကျောင်းဆောင်သံဖြူမိုးတခုလုံး ပွင့်ပါလားသည်။ အခေါင်မိုးပွင့်လားသဖြင့် မိုးကျောက်ခဲများ အကျွန်ုပ်ရို့ခေါင်းထက်သို့ အတိုင်းသားကျသည်။ အကျွန်ုပ်လည်း ကောင်းကောင်းကြောက်၍ ကျောာင်းအောက်သို့ဆင်းပြီးဖို့ ကြိုးစားသည်။ ထိုအချိန်တွင် လီကောင်းကောင်းပြင်းသဖြင့် အကျွန်ုလည်း လီသတ်၍ လဲကျခါနီးနီးဖြစ်လားသည်။ သတိပြန်ဝင်၍ ကျောင်းတိုင်ကိုဖက်တွင်ထားလိုက်သည်။ ကံကောင်း၍ သီဖီးက လွတ်သည်။ မုန်းတိုင်းအား ကောင်းကောင်းပြင်းသဖြင့် ဘုန်းကြီးကျောင်းက သစ်ပင်အားလုံး အမြစ်ကျွတ်ပြီး ပြိုလဲကုန်သည်။ အကယ်၍ ကြောက်စိတ်မွှမ်ပြီ်းထွက်ပြီးသည်ဟိသော် အပင်ပိ၍သီမည်မှာ အမှန်ဖြစ်သည်။ နောက်နိမိုးလင်းလျှင် နီရာအနှံ့ သစ်ပင်များပြိုလဲလျှက်ဟိသည်။ သစ်ကိုင်းကျိုးများ ဒေါင့်တိုင်းကြောင်းတိုင်း ဗြန်းစိကာရ ကြင်းလျှက်ဟိသည်။ ကျောင်းဆောင်ခေါင်မိုး ပုန်းဖီပုန်းလျား သံဖြူမိုး ကျောင်းနှင့် သုံးဖာလုံလောက်အကွာ လယ်ကွင်းပြင်တွင် လက်လံလေးလံလောက် နစ်မြုတ်လျှက်တွိရသည်။ ဘုန်းကြီးကျောင်းတွင် စုတ်ဖွာပင်း လေးငါးပင်ဟိပါသည်။ စုတ်ဖွားပင်အားလုံး အမြစ်ကျွတ်၍ လဲကျကုန်သည်။ စုတ်ဖွားသီးအားလုံးကြွီကျပြီး နီရာအနှံ့ ပြန့်ကြင်းလျှက်ဟိသည်။ စုတ်ဖွားသီးကောက်၍ ၀မ်းတင်းအောင်စားရသည်။ တချို့က တိုက်ဆိုင်မှုဟု ယူဆသည်။ ရွာကို ကျားတောင်ရောက်တေဆိုသော ကိုမြတ်ကျော၏သတိပီးသောစကားကိုကောက်၍ တိုက်ဆိုင်မှုအယူကို အကျွန်ုပ်လုံးဝလက်ခံ၍ မရပါ။

ဇတ်လမ်းကို ပြန်ဆက်ရသော် ယင်းအချိန်ကာလ၌ Internet ပေါင်းကူးနှင့် Email များမပေါ်သိမ့်သဖြင့် ပြည်တွင်းပြည်ပကျောင်းသားများ အဆက်အသွယ်ပြုလုပ်ရန် ကောင်းကောင်းခက်ခဲပါသည်။ ပြည်ထဲသို့ ပြန်လွှတ်လိုက်သော ကိုချိုဖံ၊ ကိုလှကြည်ရို့နှင့်လည်း လုံးဝအဆက်အသွယ်ပြတ်တောက်လားသည်။ နောက်ပိုင်း ကိုချိုဇံ အိန္ဒိယ မဏိပူရ လေခွန်းစခန်းသို့ ရောက်ဟိလာကြောင်းသတင်းကြားသိရသည်။ သို့ဖြင့် အိန္ဒိယရောက်ကျောင်းသားများနှင့် အဆက်အသွယ်ရရန် အိန္ဒိယခရီးစဉ်ကို အကောင်အထည်ဖော်ရပါတော့သည်။

ဟာရဘင်းဘုန်းကြီးကျောင်း၌ဟိစဉ် မောင်သျှင်ကြီးစိန်လှမောင်က မြိုတောင်တွင် စာသင်ကျောင်းတကျောင်းဆောက်ပီးချင်သော ဆန္ဒဟိသည်။ မြိုရွာသူကြီးနှင့်အဆက်အသွယ်ဟိ၍ ရွာသားများက အစားရိက္ခာထောက်ပံ့ပီးမည်။ စာသင်ပီးရန် ကျောင်းဆရာချေတယောက်လိုအပ်သည်။ အကျွန်ုပ်လည်း ယင်းမြိုတောင်သို့လားရောက်၍ ကျောင်းဆရာလုပ်ချင်သော ဆန္ဒဟိသည်။ သို့သော် အန္ဒိယခရီးစဉ်ကို ပထမဦးစားပီးဖြစ်လားသည်။ သို့သော် မြိုတောင်သို့တခေါက်ရောက်ဖူးချင်သောဆန္ဒဟိသဖြင့် အိန္ဒိယဖက်သို့မကူးခင် မြိုတောင်တခေါက် ခရီးလားဖြစ်လိုက်သည်။ မြိုတောင်ခရီးအကြောင်းမရွီးခင် ရခိုင်ကျောင်းသားများ၏သပွတ်အူဇတ်လမ်းကို ဤမှာတွင် ခေတ္တအဆုံးသတ်ပါမည်။

မြိုတောင်ခရီး (ဆက်ရန်)